Tebḍa tḥawact-a ɣef 14 n tzalɣiwin d-yettwazelɣen deg ukatar n tyaka tafriqit d 20 n tzalɣiwin d-yettwazelɣen deg telɣuɣa taɛṛabt. Deffir ma tebda Lamis Idriss adraw-nnes akken yelha, tezleɣ inidiyen n 45 n yikilugṛamen n tmeẓẓyanin deg snat n tyakiwin, yerwi tewwi-d 6 n tzalɣiwin n wureɣ, ma d aweɣlan-nnes Anes Salim yeflali-d ula d netta s kraḍt n tzalɣiwin taɛṛabin deg taggayt n yimeẓẓyanen n 55 n yikilugṛamen deg tmezzugin n wustif, uḥwiṣ-imzelli d uɣrud ulampi.

Dima deg taggayt-a n usakel, Seif Eddine Djebari yezleɣ-d kraḍt n tzalɣiwin n uẓref deg Telɣuɣa Tafriqit, deg wakud mani Moussa Haroun yewwi-d kraḍt n tzalɣiwin n ubṛunz ɣer yimeẓẓyanen n taggayt n 60 n yikilugṛamen.

Seg yidis-nnes, tesbuɣer tnaddalt tadzayrit Bouchra Saadi tacrawt taɣelnawt s sat n tzalɣiwin. Tezleɣ-d tazalɣi n ubṛunz deg Telɣuɣa n Tefriqt n yilemẓiyen, deg taggayt n 49 n yikilugṛamen, d kraḍt n tzalɣiwin niḍen n ubṛunz deg tyaka taɛṛabt n taggayt-a. Ɣer yimeqqranen, terna tezleɣ-d kraḍt n tzalɣiwin deg Telɣuɣa Taɛṛabt, gar-asent tazalɣi n ubṛunz deg wustif, tin n wureɣ deg wuḥwiṣimzelli d tin n ubṛunz deg uɣrud ulampi.

Seg yidis-nnes, Abdelmoumen Chetoui yewwi-d kraḍt n tzalɣiwin deg Telɣuɣa n Tefriqt ɣer yilemẓiyen n taggayt n 60 n yikilugṛamen, gar-asent yiwet n ubṛunz deg wustif, tin n uẓref deg wuḥwiṣ-imzelli d yiwet n ubṛunz deg uɣrud ulampi. Deg tyaka taɛṛabt, yezleɣ-d tazalɣi n ubṛunz deg wuḥwiṣ-imzelli ɣer yilemẓiyen, d snat n tzalɣiwin n ubṛunz deg wuḥwiṣ imzelli d uɣrud ulampi deg taggayt n yimeqqranen.

Tadzayrit Fatima Bendad tuwes daɣ deg tḥawact taɣelnawt s uzlaɣ n snat n tzalɣiwin n ubṛunz deg Telɣuɣa n Tefriqt, deg wuḥwiṣ-imzelli deg taggayin n tmeẓẓyanin d tlemẓiyin. Terna-d kuẓet n tzalɣiwin n ubṛunz deg tyaka taɛṛabt, gar-asent yiwet deg wuḥwiṣ-imzelli n yimeqqranen.

Tayaka-a ad tkemmel ass n usimwas s yinidiyen n taggayin n 53 n yikilugṛamen ɣer tsednan d 65 n yikilugṛamen ɣer yirgazen, deg taggayin yemgirrden n usmuder. Tilɣuɣiwin-a ssuddsen-tent deg usadus addalan n Umenzaḍ Ferradj n Mestɣanem mani d-mlalen 340 n yinaddalen (irgazen d tsednan) d-yettgensisen 29 n tmura tifriqiyin d taɛṛabin. Tayaka-a ad tfak ass n 13 tubeṛ.

Talɣaɣa n Tefriqt d Telɣuɣa Taɛṛabt n Udkal n Tẓayanin: Dzayer tewweḍ ɣer 34 n tzalɣiwin