Tamyugart-a n wuɣal ssefran naqal ad d-tili ɣef tis 8:00 n tmeddit (s wakud adzayri), maca ur tebdi ara armi d tis 9:20 n tmeddit s wugar n usrag n ugellel, ɣef lǧal n unbaẓ i nebẓen yisebɣasen idiganen anrar.

Wa d abeɣrar mani smentsen imuraren n Tdukli Taddalant n Dzayer yernu sresnen-ten, dɣa d aya i ten-yeǧǧan ad ddun s tɣawla ɣer tnelsa yernu ad qqimen din armi d-yuɣal udki.
Aqusis n Olympique Club d netta i d-yesseknen tizemmar-nnes d amezwaru yernu ḍruɣ yessadef iswi deg tratta n umḍif n Tdukli, Oussama Benbot, akken kan tebda temyugart, maca aneggaru-a yessaweḍ ad yerr akk arramen n ufna.

Seg yidis n wagir, taɣlamt n Uzewwaɣ d Uberkan ur tebdi ara tetteffeɣ-d seg ujeɣlal-nnes armi i tekka tefkuẓt n usrag tamezwarut yernu d amurar ilemẓi ivwaṛi Kamagate i d-yeflalin imir-nni.

Maca armi d timikt tis 45+1 i ssawḍen yimuraren n Tdukli ad ssidfen iswi-nsen amezwaru s tyita n temqasit. Aya yella-d ɣef tinnalit n tcirt deg tjumma n uṣeggem yernu d anagraw n VAR i tt-id-yeṭṭfen. D amenṭag Ahmed Khaldi i yessadfen iswi-a yernu iga-d agmuḍ n 1 ɣer 0.

Mi d-uɣalen yimuraren seg tnelsa, kemmlen yimuraren n Tdukli anṭag-nsen, deg wakud mani Benbot iḍuf “taḥanut” ɣer deffir. Tkemmel akka armi i yessaweḍ Usinigali Moussa Kone n teɣlamt n ufna akken ad yessegdu agmuḍ s tyita n teɣmert seg yidis ayeffus (1-1).

Ccil n wanect n warramen d-yellan ama seg yidis-a, ama seg yidis-ihin, agmuḍ yeqqim kan akken armi i tfuk temyugart, yernu yella-d waya i tumert n Tdukli imi i tessaweḍ ad taɣer ɣer tgarant.

Tadukli Taddalant n Dzayer d nettat i izelɣen Taqbuct deg 2023. Deg tgarant-a wuɣur tuɣer, ad turar mgal Zamalek n Maṣer i yessawḍen ad tafes Tillumẓa Taddalant n Belouizad (0-1, 0-0) ass n usimwas deg unarir n Lqahira, deg uzgen n tgarant n wuɣal. Zamalek tuɣer s trennawt-nnes deg temyugart n twadda d-yellan deg Dzayer Tamaneɣt.

Tagarant n teẓrigt-a n 2026 n Teqbuct n Tkunfidiṛalit Tafriqit (C3) ad d-tili s twadda d wuɣal ussan n 9 d 16 mayu d-itteddun. D Tadukli Taddalant n Dzayer ara iremsen tafnat-nnes d tamezwarut deg Dzayer Tamaneɣt, sakkin, d teddu ɣer Maṣer ilmend n ugmuḍ agaran.

Asaḍen n Tdukli Taddalant n Dzayer uɣren ɣer tgarant n Teqbuct n Tkunfidiṛalit Tafriqit n Tcirḍart