« S yisem n Yuc Amallay Amnahaɣ, talemmiḥt d talwit ɣef umazun-nnes ahaggaṛ akk,

A tiweɣlanin,

A iweɣlanen iɛzizen,

Yesfugul uɣref adzayri, ass-a, Ass Aɣelnaw n Umjahed, d ass yesfugulen amulli aslag n Wagir n Ugafa n Qsenṭina d Usmanay n Ṣṣumam. Ta d talemmiẓt i umekti n yinfusen n yirgazen-nni, imjahden d yimeɣrusen, d wid yeqqimen d imekdiyen i tgallit – ad asen-Yefk Yuc tadawsa d tmeddurt tazegrart. Nnuɣen yernu zban armi d asmi i d-ttwareẓqen s trennawt, yernu d aya i ten-yeǧǧan ad ṭṭfen deg umirew-nsen i Yuc i asen-d-Yefkan ayen i asen-Yeḍwel, Netta yellan d adhal yifen akk wiyaḍ.

Azemz-a d win yeččuṛen d tinnukkeft d tesmedna, d win iseg d-tugem tsuta tayiwnant n Wamber akken ad teḥrez tajajiḥt n Tegrawla i d-tessaɣ, yernu yella-d waya ilmend n ukemmel n umhaz, asemɣer d usenyuddu n Tegrawla deg ukatar n Tesguri n Umenzu n Wamber, d uqabel n yiɣawasen isnuddsanen n yiduba ihersanen yellan sulen ttqemmiren ɣef uswad n ukemmel n useknu n Dzayer ddaw uzaglu ahersan d ukemmel n uɣmar-nsen s useqdec n wakk ammaken akken ur izemmer ara uɣref adzayri ad yessuggem akken ad yedder deg tlelli d uzarug.
Agiren n Ugafa n Qsenṭina, i iga umeɣrus azamul Zighoud Youcef, llant yernu ad kemmlent ad ilint d anfus ameqqran, s wakk ayen yeḍran deg-sent d uguccel d-yellan deg tedyanin-a, d tid yeččuṛen d aseksem n wazalen unnigen akk ddaw tekbabt n Terni d Tredsa n Uslelli Aɣelnaw. Agiren-a ǧǧan-d iselmad imezruyanen d imeqqranen d-yettgensisen afensu d-yettafken tafat ama i umha, ama i yimal, d wid d-yeǧǧan timsirin i wakk medden, d tid d-yesskanayen dakken Dzayer tella yernu ad teqqim dima teṭṭef deg temyamaẓt, tamsetlelt d tdukli taɣelnawt iyes tt-id-Yerẓeq Yuc.

Dɣa, Ass Aɣelnaw n Umjahed yeqqen hullan ɣer tkatut n usuddes n Usmanay n Ṣṣuman, asmanay-a amezruyan d-yesbecklen asenfar d anummid i usuddes d usefrek n Tegrawla deg tsekta-nnes taredsant, talujistant, tasuddsant d tsiḍfant, s uzeddi n tsuda d-yettgensisen tumast nn Tegrawla deg wakk tiɣula, ladɣa seg yidis aredsan, asertan d ulɣudan, d usiweḍ n taɣect-nnes ɣer tsuda tigraɣlanin. S waya, asmanay-a amezruyan yessegrer asenfar agrawlan deg wakk tisektiwin-nnes akken ad iqabel tiḍni tahersant tadusant n yimir-nni, i tedhel Temsisit Taṭlasit.

A tiweɣlanin d yiweɣlanen iɛzizen,

Ma yella 20 ɣuct 1955 yettgensis-d tasnuddest i uqabel n yisraten icenga deg unrar, ass n 20 ɣuct 1956 yettgensis-d aneggez d aɣaran i d-yessenfalin tasnuddest tagetsektant, d win d-yesɣenwen amnekni d amaynu gar yidisan n yimenɣi deg wayen yerzan asɣiwes d usuddes. S waya, Tagrawla n Uslelli Aɣelnaw tuɣal d azwil i yesneflen tagda n usehres ansayan, maci kan deg Dzayer, wanag ɣer wakk iɣerfan yettwaḍelmen deg tmura-nsen.

Deg wakud mani d-nettmekti takkayin-a timezruyanin tiɣettasin, yernu nesmektay-d s uzamul n umjahed d udeg-nnes unnig deg tefrit n uɣlan, nbedder-d daɣ s ufrac amha n Dzayer tanalakt. D amha d-yettnekmamen s uḥraz n tnaya taɣelnawt d usdusu n tmeṣkiwt n uwanak d adusan s tsuda-nnes, d win yersen ɣef tefrit n tillumẓa-nnes d temyamaẓt n uɣref-nnes, akken ad yeqqim yizen n yimeɣrusen d yimjahden d amuddir, d imfeǧǧeǧ s tinnukkeft yernu d win ara idemmren tamurt-nneɣ ɣer yiglan n temɣer, tanaya d tizzugra.

Deg tgara, ad d-greɣ tiɣri, deg tlemmiẓt-a tamektayt, i tsuta n wass-a akken ad tesgir izen n yibabaten d yidaddaten, ad d-tfareṣ seg temsirin n tɣersawin-nsen tinallamin yernu ad tesfukti deg ukemmel n wussisen ilmend n usali n ukelmat d useḍru n wuggumen n tsuta tamangant n Wamber.

Ad knuɣ i tkatut n yimeɣrusen-nneɣ ibɣasen, yernu ad ssiwḍeɣ azulen-inu n uzrak d uguḍa i yessetmat-neɣ d waytmaten-nneɣ imjahden deg wass-a aɣelnaw, yernu ssarameɣ-asen tadawsa tunzigt d telhillit tummidt.

Tudert i Dzayer

Tamanegt d uɣlal i yimeɣrusen-nneɣ ibɣasen

Talwit, Tamella d Tlemmiḥt n Yuc fell-awen.”

Izen n uselway n tegduda ilmend n Wass Aɣelnaw n Umjahed