Asafag-a yettwarmes deg Unafag Agraɣlan n Houari Boumediene, yernu wa d asafag n wazun n Airbus A330neo mumi semman « Gaṛa Jbilat ». Wa d asafag wis sin n wazun-a i yettwarnan ɣer tanawt-a, deffir usafag amezwaru d-yettwaremsen deg wamber yezrin, win mumi semman « Wamber 54 ».

Azun-a n yisafagen ḥazen-t-id i taffugin tizegrarin, yernu takebbanit tettmahal akken ad tessugget taffuguin-a s uciri d usdusu n mennaw n yizirigen igennanen, ladɣa ɣer Kanada, Ccinwa d Tefriqt n Unẓul.

Isafagen n Airbus A330neo flalin-d s ukettur-nsen akken ad refden 300 n yimsiklen yebḍan ɣef wamunen yemgirrden, d usiger n 25% n userɣu d yisgalen n CO2, ɣef leḥsab n yisafagen n tsutwin yezrin. Isafagen-a lan daɣ inagrawen n usfurhet d itraren hullan, am umeẓlu n tɣuni ɣer Internet s uwifi.

S usafag-a amaynu, tuɣal tanawt n Air Algerie tla 56 n yisafagen, ara yettwarnun ɣer 15 n yisafagen n teṛmist n Domestic Airlines (yellan d afurk n Air Algerie). Tanawt-a ad ternu ugar deg yiseggasen d-itteddun.

Tamhelt-a tella-d deg ukatar n wahil n usmuynet d usemɣer n tanawt n umesnay-a aɣelnaw, d-yettwacaren deg 2023, mani ssefrayen ad d-sɣen tam (8) n yisafagen n wazun n Boeing 737 MAX-9 d tam (8) n yisafagen niḍen n wazun n Airbus A330-900neo, ngum ma ssutren-d mraw (10) n yisafagen niḍen n Airbus.

Ahil-a d win mani ssefran daɣ timesɣiwt n mraw-sḍis (16) n yisafage n wazun n ATR 72-600, i usdusu n uẓeḍwu n umesni agennan agensi.

Akaten-a llan-d deg ukatar n uɣawas n tigawt n Air Algerie seg-a ɣer 2035 mani ssefrayen ad rnun ad d-sɣen ugar n yisafagen akken ad sdewten asuter anernay deg wayen yerzan amesni agennan ama deg uswir aɣelnaw, ama deg uswir agraɣlan.

Air Algerie termes-d asafag wis sin deg ukatar n wahil n usmuynet n tanawt-nnes