Aɣlif n tkerrazt yebda-d uddun n yimkerrazen d yimeksawen i yettwaḥuzan

DZAYER TAMANEƔT – Yebda uɣlif n tkerrazt, asnegmu awmazir, d ugmar awlal addun n umuɣ n yimkerrazen d yimeksawen i kelsen lexṣayeṛ deg treɛqay-nsen deffir n yiḥemmalen i d-yellan seg melmi kan d waḍu adusan i iḥuzan mennaw n twilayin n tmurt. Aya yella-d i usnas d uzrak n yisendah d tsunḍiwin n uselway n tegduda, Mass Abdelmadjid Tebboune, i lmend n tukci n tallelt i wid yenḍurren seg unfal n tegnawt, ɣef wakken i d-yenna ass n ukwas yiwen n welɣu n uɣlif.