« Deg ukatar n uḍkal awakkay n tegnatin tisurfanin ideg ddren yiɣermanen imeḍruren deffir tmurɣiyin i iḥuzan kra n twilayin n tmurt, yernu ilmend n uḍman n ukemmel n wadaf ɣer yimeẓla n tɣellist tanmettit, Asenduq Aɣelnaw n Usenkid Anmetti yeddem mennaw n wakaten utriben ilmend n yisunkiden inmettiyen d yimttalasen-nsen i yesṛuḥen tikarḍiwin-nsen n Chifa deg tmurɣiyin-a », ɣef wakken d-yesseddi ulɣu-a.

Ilmend n waya, « yessers-d Usenduq yiwen n useɣwen aliktṛunan i twilayin n Ǧiǧel, Bgayet, Skikda, Tizi Uzzu, Ɛennaba, Ṭṭaref d Mila, ilmend n usuter n tsukint tamaynut n tkarḍa n Chfa, war ma ḍefren tisekkirin tideblanin yellan ttwasnasent deg waya, yernu war ma ddan ɣer temṣukin n Usenduq akken ad ssersen asuter ».

Iswi n wakat-a d “asifses n tirinin tideblanin ɣef yimdanen imeḍruren, ackaḍ n ukala n usmuynet n tkarḍiwin n Chifa d uḍman n ukemmel n wadaf ɣer yimeẓla yemgirrden n Usenduq. » S waya, « asuffeɣ n tkarḍiwin n Chifa timaynutin ad d-yili, s wudem asurfan, seg tmehla tamatut n Usenduq, yernu d aya ara ireẓmen tawwurt i uḍkal arurad n yisutren n yimdanen imeḍruren d usmuken-nsen war leɛḍil », ɣef wakken d-yerna ulɣu-a.

Dima deg temsalt-a, yenced-d Usenduq akk isunkiden inmettiyen d yimttalasen i ḥuzant tmurɣiyin-a akken ad d-sfaydin seg wakat-a s useɣwen aliktṛunan d-yettewgen i waya:

https://elhanaa.cnas.dz/chifafeucnas.xhtml niɣ s usmel unṣib n Usenduq: www.cnas.dz

Yezzireg-d daɣ Usenduq Aɣelnaw n Yisunkiden Inmettiyen dakken tasentayt-a tella-d deg ukatar n “usekmem n tsertit n usides n tedbelt ɣer uɣerman, aselhu n umeẓlu anagdud d uḍkal arurad n yisrayen isurfanen n yisunkiden inmettiyen d yimttalasen, ladɣa deg tegnatin timelɣiyin ilmend n uḍman n yizerfan-nsen d ukemmel n wadaf-nsen ɣer yimeẓla n tɣellist tanmettit”.

Timurɣiyin: Akaten utriben ilmend n yisunkiden inmettiyen yesṛuḥen tikaṛdiwin-nsen n Chifa