Tesmahi-d Dzayer, deg Kazan, tarmit-nnes deg usfulmen n yilemẓiyen d usileɣ n yihri alsan

DZAYER TAMANEƔT – Tesmahi-d Dzayer tarmit-nnes deg wayen yerzan asfulmen n yilemẓiyen d usileɣ n yihri alsan, deg udraw-nnes deg teẓrigt tis 5 n Tqacuct Tanmaḍalt n Tillumẓa n Kazan (Tagduda n Tataṛstan, Rrus), ɣef wakken d-yenna, ass n usinas, yiwen n ulɣu n uɣlif n tillumẓa.

Deg tqacuct-a, i d-yellan seg 26 ɣer 30 ɣuct yezrin n usgum n “Asegmi deg tallit n yilkaten inmaḍalen: Tissugriwin ilmend n unegmu unzig », awnetlay amatu n uɣlif n tillumẓa, Mass Dahmane Adimi, agensas n uneɣlaf n ugzum, d-yelhan s Useqqamu Imineg n Tillumẓa, Mass Mustapha Hidaoui, yesseddi-d dakken « Dzayer, ddaw ulway n uselway n tegduda, Mass Abdelmadjid Tebboune, ur tettwali ara ilemẓiyen d taggayt kan tanmettit yesrin aḍkal, wanag d taɣbalut tasnuddsant iɣef ttwaṣkayen yiwanaken yernu messlen-d imal-nsen ».

« Tamsalt n usfulmen n yilemẓiyen deg Dzayer ur teqqim ara kan deg uḍman n temrest niɣ adeg deg tesdawit, wanag lhan-d id-s s yisem-nnes d asenfar aɣelnaw anummid ilmend n tmeṣkiwt n uɣerman adzayri », ɣef wakken d-yerna.

Iwekked-d, deg temsalt-a, ɣef umhaz i d-yellan deg tsertiyin tiɣelnawin i yekkan seg tmeẓla n uḍkal n yilemẓiyen ɣer tin n usfulmen-nsen yernu aya yessutur-d, ɣef wakken d-yenna, tukci n yifecka i yilemẓiyen akken ad awsen deg useɣnew n tbuɣar, yernu yezzireg-d dakken tamlilt n uwanak « ur tebdid ara kan deg useɣnew n temras, wanag terza daɣ aseɣnew n tegnatin ara d-yeslalen timras ».

Mi d-yebder asileɣ d ulmud amsadur, yezzireg-d umasay-a ɣef tixxutert n usfukti deg tmesnegt s yisem-nnes d tabaɣurt taɣelnawt, yernu yessegza-d dakken tadamsa tatrart tessutur-d ama d amsatwil, ama d ineḍ, ama d ameswuri amaɣur, ama d ajenyuṛ d umnadi.