Ɣef leḥsab n uɣlif, « aseqdec n yiḥerbiyen d turarin n tmest, ladɣa tama n tnezduɣin, imseddayen d tnegwa timendarin i izemren ad d-gent timurɣiyin, aggasen d tmerɣiwin d timendagin i izemren ad ḥazent ifassen, iḍudan, iɣallen, udem d tiṭṭawin, yernu d aya i izemren ad d-yeglu s yifraɣen, tizmulin d yizemmulen d imezgiyen ».

Aseqdec n yifarisen imsetwilanen yezmer daɣ ad d-yeglu s “wabbay n yiḍudan d yimaslaḍen deffir uṭiqqes n uḥeṛbi deg ufus », am wakken i yezmer ad yessiweḍ waya ɣer « waggasen deg tiṭṭawin i izemren ad ssiwḍen, deg tejṛa timendagin akk, ɣer tidderɣelt ».

Yebder-d ulɣu-a daɣ dakken “acewwel yeqqnen ɣer wahit d uṭiqqes n yifarisen-a yezmer ad yeswaɣ tadawsa d telhillit tasnafsant d tfekkant n yimdanen yernu yezmer ad yessiweḍ ɣer wuguren n tmesliwt, ladɣa ɣer yigerdan, imɣaren, imuḍinen d tsednan s tadist.

Mer ad d-yili waggas, yessemter-d uɣlif mennaw n wakaten ara yettwaḍefren , gar-asen “asismeḍ n wasun yerɣan s waman n tberrint imuzɣilen i tenzagt n 15 n tmikin, ur yessefk ara ad ssersen agris dindin ɣef tmerɣiwt, ur yessefk ara ad ḍlun isafaren insayanen i tmerɣiwt-nni yernu ur yessefk ara ad as-ḍlun daɣ iẓma yexḍan asemgel n tmerɣiwt.

Yessemtar-d daɣ uɣlif akken amagus ad yeddu dindin ɣer yimeẓla n tetrabin tisnajyanin d-yudsen akk « mer ad tili tmerɣiwt d tamendagt, mer ad agsent tiṭṭawin, udem niɣ ifassen, niɣ mer ad d-yili ummeẓḍu n waggas », am wakken d-yenced iɣermanen akken ad sfuglen tameɣra-a deg « tegnawt n tumert, tafrawt d tegmat, mebɛid ɣef twakliwin timihawin i izemren ad rrent imir n tumert d asehwu akemmay ara d-yeglun s yinalkamen d isḥassafen ».

Asfugel n Tlalit n Waser: Yeccaɣli-d uɣlif n tdawsa mgal useqdec n yifarisen imsetwilanen