Wekkden-d yilɣuden yemgirrden ɣef tsekta tazamulant n terzi-a n Ubaba ɣef Dzayer yellan d tamurt n talwit d tezdellit.

Deg yiwen n umagrad s uzwel n “Abeddu n Terzi Tamezruyant ɣef Dzayer… Ababa n Vatican Yemsaka-d Izen n Talwit », iwekked-d uɣmis n “Asharq Al-Awsat » ɣef tejmilt i yerra uɣref adzayri i Leon Wis 14.

Seg yidis-nnes, yebder-d usmel n “Al Jazeera”, deg yiwen n umagrad s uzwel n « Ababa n Vatican Yebda-d Tirzi d Tamezruyant ɣef Dzayer », armas azeqqal i as-gan i Ubaba mi d-yewweḍ, ass n uynas tanezzayt, d mi yekka ass-nnes deg tmurt-nneɣ.,

Asmel-a aqaṭari yenna-d dakken tirzi-a “tla tasekta tudmawant d tadusant i Ubaba ara yeddun deg yidrizen n Ugerram Agustan ».

Yebder-d usmel n Al Jazeera, deg tawwayt-nnes, akk takkayin n wass amezwaru n terzi-a, seg urmas i as-iga uselway n tegduda, Mass Abdelmadjid Tebboune, armi d inawen d-yettwaɣran d yiznan yessawaḍen azalen n tezdellit d talwit.

Aɣmis n « Al-Quds Al-Arabi » yebder-d, seg yidis-nnes, idis ayiwnan n tedyant-a yernu yura-d aṭas ɣef tsekta-nnes tazamulant, am wakken d-yesmekti dakken Ababa Leon Wis 14 d uselway n tegduda, Mass Abdelmadjid Tebboune, ḥetteten-d ɣef wazalen ubligen am ugami n tekriḍt, imgura d traɣdemt deg umaḍal.

Asmel n « Russia Today » yura-d dakken tirzi-a tettgensis-d “takkayt d taxatart deg wassaɣen gar Vatican d Dzayer yernu a win yufan ad d-tessken timeɣsiwt n sin-a n yidisan akken ad sdusen amsegzu d unmireg ilmend n talwit d talsa ».

Asmel n « Vatican News » yebder-d, seg tama-nnes, abeddu n usikel n Ubaba deg Tefriqt, yernu iwekked-d dakken tirzi-nnes ɣef Dzayer teqqen hullan ɣer yiẓuran-nnes igustaniyen.

M d-yebder imiren ixataren akk n wahil n wass-nnes amezwaru deg Dzayer, yenna-d usmel n yisalan n Vatican dakken Ababa iger-d tiɣri i usmal n udiwenni, ugar n teɣdemt i yiɣefan d wammad n udabu yexḍan akk tameẓla n uɣmar.

Asmel n « InfoCatolica » yebder-d tissugriwin n Ubaba Leon Wis 14 mani d-yumel “tsemgurit d tegmat n uɣref ilemẓi d udusan », d win wuɣur « timmidwa, taflest d temsetlelt maci d awalen ilmawen, wanag d azalen inumasen yefkan talqayt d tdusi i tmeddurt tubligt » yernu yekrebba ɣef umezruy n Dzayer yellan d « akemmay (…) maca d win yeččuṛen d tabɣest d tiddeɣri s tihhugṛa n yiziɣer yellan d yiwet seg tsebgan » n uɣref adzayri.

Aɣmis abriṭani « The Guardian » yessegza-d dakken Ababa Leon Wis 14 yewweḍ ɣer Dzayer deg ukatar n terzi tababant tamezwarut ɣef tmurt-a, yernu iger-d tiɣri i talwit deg takkayt-nnes tamezwarut n tuzzya-nnes ɣef Tefriqt, dɣa d aya i d-yesskanayen tixxutert tanernayt i ila umenẓaw-a ɣer teklizt takaṭulit.

BBC twekked-d ɣef tixxutert n ufran n Dzayer s yisem-nnes d takkayt tamezwarut n terzi n Ubaba, yernu tenna-d dakken aɣtas-a yesskanay-d « tixxutert talqayant » i yettafk Vatican i Dzayer s yisem-nnes d adeg aziɣran d umezruyan iɣef ur telli trewla.

Tanegga tamarikanit n tɣemsa n “Associated Press” tesseɣmes-d, seg yidis-nnes, dakken Ababa iger-d tiɣri i talwit d usebded n “tazniwin tinayhersanin » deg yiweẓla inmaḍalen, am wakken d-tezzireg dakken Ababa yerza-d ɣef Dzayer akken ad yesmel tazdellit gar yiɣerfan deg tallit mani d-yettili umyenkaf d anmaḍal, am wakken i d-yerza akken ad yerr tajmilt i Ugerram Agustan, yellan d udem adigan iseg d-tettwahreg tizziɣert-nnes tasɣanant.

Tirzi tamezruyant n Ubaba Leon Wis 14 ɣef Dzayer tenzeɣ-d tagerrawt n tɣemsa tagraɣlant