Menu principal

Menu principal

Aselway Tebboune: Turarin Tigrakalanin  llant-d d amures yefkan aṣda

Yeffeɣ-d ass n : Aynas, 01 Ɣuct 2022 11:35   Ɣran-t : 0 n tikkal
Aselway Tebboune: Turarin Tigrakalanin  llant-d d amures yefkan aṣda

ZZAYER TAMANEƔT – Iwekked-d uselway n tegduda, Mass Abdelmadjid Tebboune, dakken Turarin Tigrakalanin n Wehṛan n 2022 llant-d d « amures yefkan aṣda yernu d tadyant yessewhamen s temɣer-nnes ».

« Nella nessaram akken ad ilint turarin-a d amures, yernu nga s kra n wayen umi nezmer i lmend n waya. Amures-a d win yefkan aṣda yernu medden akk wehmen s temɣer-nnes », ɣef wakken ay d-iwekked uselway Tebboune deg umyager-nnes awalan d tɣemsa taɣelnawt ay d-iɛeddan, ass n usamas, deg tregwa n tliẓrit d ṛṛadyu tiɣelnawin.

« Yedrew uɣref azzayri deg umures-a, yernu yella-d waya s temlilt ay turar tmetti taɣarimt n Wehṛan d temnaḍin niḍen. Usan-d Yizzayriyen seg 58 n twilayin akken ad sbeɣsen inaddalen-nneɣ », ɣef wakken ay d-yenna uselway Tebboune ay d-yernan dakken amures n turarin-a yella-d s « umahil ifazen ay gant tiddukliwin n tmetti taɣarimt d umḍan ameqran n yiwiziwen ay iderwen deg usuddes n tedyant-a bennan yernu aya d ayen ay d-yesskanayen tabɣest-nsen akken ad mahlen i lmend n uɣlan ».

« Turarin-a llant-d d tadyant taxatart yernu ass-a, yella umezruy n uqbel Turarin Tigrakalanin n Wehṛan d win n deffir turarin-a », ɣef wakken ay d-yerna uselway Tebboune.

Turarin Tigrakalanin llant-d deg Wehṛan gar 25 Yunyu d 6 Yulyu 2022. Zzayer tewwi-d adeg wis 4 deg usmunu n tzalɣiwin s 5 n tzalɣiwin (20 n wureɣ, 17 n uẓref d 16 n ubṛunz). D tikkelt tamezwarut aydeg ara d-tḥaz Zzayer igmaḍ am wi.

 

Last modified on Asinas, 02 Ɣuct 2022 09:39
Aselway Tebboune: Turarin Tigrakalanin  llant-d d amures yefkan aṣda
  Yeffeɣ-d ass n : Aynas, 01 Ɣuct 2022 11:35     Taggayt : ADDAL     Ɣran-t : 0 n tikkal   Bḍu