Menu principal

Menu principal

Turarin Tigrakalanin n Wehṛan n 2022: Wehṛan « Tahuskayt » tcebbeḥ-d s yiniten igrakalanen

Yeffeɣ-d ass n : Asamas, 26 Yunyu 2022 12:42   Ɣran-t : 23 n tikkal
Turarin Tigrakalanin n Wehṛan n 2022: Wehṛan « Tahuskayt » tcebbeḥ-d s yiniten igrakalanen

WEHṚAN – Tafugla n urẓam n teẓrigt tis 19 n Turarin Tigrakalanin ay d-yellan deg Wehṛan ass n usiḍyas tameddit d tin aydeg tamdint-a tahuskayt telsa-d akk initen igrakalanen deg yiwen n unahay anẓawan d uẓuran ifazen, d win ay d-iwekkden ɣef umezruy d wazalen n Zzayer.  

Tafugla-a yeḥdeṛ-itt lamir n Uwanak n Qaṭar, Tifazit-nnes Ccix Tamim Ben Hamad Al-Thani, yellan d inebgi n userhu n teẓrigt-a.

Aẓawan n tfugla twet-it tuṛkist tasamfunant n wazal n 100 n yimẓawanen. D tin aydeg d-gan imussa iẓuranen deg tjumma n 9.000 n yimitren imkuẓen yernu sqedcen 500 n yidṛunen i lmend n waya ɣer yidis n turarin n tmest.

Derwen 800 n yimdanen deg usemned aẓuran aydeg d-smenden 20 n tfelwiyin. Gar yimdanen-a llan yinaẓuren, imedrazen, imsatwilen n tugna akked wid n usfaw.

Sakkin, yella-d umsudeɣ n tmagliwin ara iderwen deg turarin-a, tamezwarut deg-sent (deg unsay) d Legrig yellan d dduḥ n tɣermiwin tigrakalanin akked Turarin Tulampiyin, sakkin ḍefrent-tt-id tmagliwin niḍen am tin n Albanya, Anduṛ, Spenyul, akked Ṭṭalyan yesɛan tamagla tameqqrant akk deg turarin-a s 371 n yinaddalen.

Tamagla n Zzayer mmugren-tt s tumert tameqqrant wid ay d-yusan ad feṛṛǧen s twaculin-nsen yernu d tin umi d-cnan taẓugayt n « One, two, three, viva l’Algérie ».

Deffir waya, yeɣra-d unesmil n Turarin Tigrakalanin, Mohamed Aziz Derouaz, inaw-nnes, ɣer yidis n uselway n Tseqqimt Tagraɣlant n Turarin Tigrakalanin, Aṭalyani Davide Tizzano, yernu wekkden-d deg sin ɣef wussisen n uwanak azzayri akken ad yesserbeḥ taẓrigt-a.

Mi fuken yinawen-a, llan-d yihanayen ikuṛigṛafanen d yifulkluṛanen, uqbel ma gan-d ahanay asewham akk, d win aydeg 500 n yidṛunen gan-d tifelwiyin n wakk addalen ara iderwen deg Turarin Tigrakalanin.

Ahanay-a d win yettwaxetmen s uẓawan n umaystṛu Salim Dada yellan daɣ d aselway n tesmilt n tfugliwin n urẓam d uxtam n Turarin Tigrakalanin n Wehṛan n 2022. Yedrew daɣ ucennay atunsi Lotfi Bouchnak ɣer yidis n tcennayt Dounia Al-Jazairia, am wakken ay tedrew tegrawt n Sidi Belɛebbas, « Raina Rai ».

Taẓirgt-a tis 19 n Turarin Tigrakalanin n Wehṛan d tin aydeg ara derwen 3.390 n yinaddalen n 26 n tmura, gar-asent 18 n tmura tuṛufiyin, 5 n tmura tifriqiyin d 3 n tmura tasyawiyin.

 

Last modified on Aynas, 27 Yunyu 2022 11:50
Turarin Tigrakalanin n Wehṛan n 2022: Wehṛan « Tahuskayt » tcebbeḥ-d s yiniten igrakalanen
  Yeffeɣ-d ass n : Asamas, 26 Yunyu 2022 12:42     Taggayt : ADDAL     Ɣran-t : 23 n tikkal   Bḍu