Ad urareb deg unarir Japoma deg Dwala ɣef usrag wis 17:00,  yerna ad awin atiki-nsen n uzgar ɣer 1/8 n teggarant n teẓrigt tis 33 n Taqbuct Tafriqit n yiɣlanen n useggas n 2021 i wexxren s aseggas n 2022 deg Kamirun i la d-iḍerrun seg wass n 9 yennayer ar 6 furar.

« Nesɛa tafrit dakken la ttraǧun akk ad tili tigawt igerzen seg yidis-nneɣ. D nekni i wumi yessefk ad neɣrem ayen i d-aɣ-iruḥen, yerna ad nefk ttbut n tɣariwin-nneɣ deg unarir. Ur nebɛid ara ɣef yiswi-nneɣ, yessefk kan fell-aneɣ ur nzeggel aɣḍam n yiswan.

Aql-aɣ negguccel yerna nebɣa ad nerbeḥ. Sɛiɣ aflas deg yimariren-is. Akken yebɣu yili win ara nqabel,  ayen yellan d axatar ugar d rrbeḥ », i d-yenna Belmadi, deg yiwen n usarag n tɣamsa i d-yettilin qbel ad yebdu wurar, i d-yeḍran deg unarir n Japoma.