Menu principal

Menu principal

Amesten aɣarim yessemtar iɣermanen ɣef tmijwin n uɣurar

Yeffeɣ-d ass n : Asamas, 14 Ɣuct 2022 13:46   Ɣran-t : 42 n tikkal
Amesten aɣarim yessemtar iɣermanen ɣef tmijwin n uɣurar

ZZAYER TAMANEƔT – Tefka-d tmehla n umesten aɣarim, ass n usiḍyas, deg yiwen n ulɣu, mennaw n yisemtar i usefrey n tɣerfa ɣef tmijwin yeqqnen ɣer uɣurar ay iḥuzan mennaw n twilayin.

Ɣef lǧal n uɣurar ay iḥuzan mennaw n twilayin n tmurt, tger-d Tmehla Tamatut n Umesten Aɣarim tiɣri i « teɣḍeft d uzrak n yisemtar n uḥezzeb i usenqes n tmijwin yerzan aɣurar », am wakken ay d-tenced iɣermanen akken « ad zerken azrak d umqit yisemtar n uḥezzeb ».

Yessemtar umesten aɣarim iɣermanen akken ur ttɣimin ara aṭas i tafukt, ladɣa imɣaren d wid yesɛan aṭṭanen yezgan akked yigerdan. Daɣ, yessemtar akken medden ad medlen lelwaḥ n tzewwa-nsen yettmagaren tafukt, yernu ad reẓmen tizewwa, deg yiḍ, akken ad ǧǧen tasmuḍi ad d-tadef.

Yenced-d daɣ iɣermanen akken ad reẓmen tiwwura d tzewwa deg yixxamen-nsen akken ad ǧǧen acelyaḍ ad yeddu yernu ur ttɣimin ara deg yideggen umdilen, am wakken ay yessefk ad sneqsen aseqdec n tesfiwin titrisanin yernu ad sneqsen tiddit deg ubrid deg tallit-a n uɣurar.

Amesten aɣarim yessemtar akken medden ad ssiklen tanezzayt zik niɣ tameddit, mi ara yerẓ lḥal, ladɣa deg twilayin n ugensu n tmurt, am wakken ay yessefk ad qqimen medden i tili anect akk umi zemren.

Amdan, ma terra-t tmara ad yeffeɣ, a win yufan ad yeqqen arazal, ad yels iceṭṭiḍen d ifessasen (tabduɣt) yernu d iwesɛanen. Iceṭṭiḍen yif-it ad sɛun initen d ifrarayen yernu yif-it ma yessanef umdan i umahil deg beṛṛa, ladɣa ma yella amahil-nnes d win yeḥwajen taẓwert tafekkant (addal, abeḥḥer, asfusker), ɣef wakken ay d-yerna ulɣu-a.

Amesten aɣarim yessemtar, daɣ, akken ur ttɛumun ara medden deg tḥarazin n waman (uggugen, iḥebbasen, isariǧen d tmedwa) yernu ur tteddun ara ɣer teftisin yettwagedlen i urdab.

Daɣ, amesten aɣarim yessemtar iɣermanen akken ad allen imdanen yesrin tallalt (isigmiyen, igerdan, imɣaren, imuḍinen) yernu ad asen-ttafken aman. Deg wayen yerzan inehhaṛen ur yesɛin ara isnezwayen, yif-it ma ur gin ara isiklen d iɣezfanen deg uzal, yernu a win yufan ad ssiklen tameddit, mi ara yerẓ lḥal, niɣ deg yiḍ.

Daɣ, yif-it ma yeqqim umdan i tili, deg udeg d asemmaḍ, ur ur yessefk ara ad ǧǧen igerdan i yiman-nsen daxel tikeṛṛusin. Yessemtar daɣ umesten aɣarim iɣermanen akken ur ttgen ara tiɣawsiwin ay izemren ad ssiɣent timest deg tẓegwa.

I lmend n tallalt n yimdanen yenḍerren, amesten aɣarim yesɛa uṭṭun azegzaw n 1021 d wuṭṭun n tetrabin n 14. Win ara yeɣren i wuṭṭunen-a, yessefk ad d-yefk tansa taseddit d yifatusen ɣef usehwu ay yeḍran, ɣef wakken ay d-yenna ulɣu-a.

 

Last modified on Aynas, 15 Ɣuct 2022 13:00
Amesten aɣarim yessemtar iɣermanen ɣef tmijwin n uɣurar
  Yeffeɣ-d ass n : Asamas, 14 Ɣuct 2022 13:46     Taggayt : TIMETTI     Ɣran-t : 42 n tikkal   Bḍu