Menu principal

Menu principal

Anafag agraɣlan n Lezzayer: Awwaḍ n « yiminigen » akken ad kken ayyur n Remḍan « deg tmurt »

Yeffeɣ-d ass n : Akwas, 18 Yunyu 2015 12:30   Ɣran-t : 111 n tikkal

LEZZAYER TAMANEƔT – Aṭas n lɣaci ay yellan ass n laṛebɛa deg unafag agraɣlan n Lezzayer: wi d iminigen idzayriyen ay yebdan ttawḍen-d « ɣer tmurt akken ad kken ayyur n Remḍan », ɣef wakken ay d-yenna yiwen n uxeddam n Air Algerie ay ixeddmen deg uklas (aseǧǧel) n yimsiklen. 

Mi d-wwḍen ɣer tzeɣɣa n unafag, mmugrent-ten twaculin-nsen ay ifeṛḥen imi ay d-mlalen akk i lmend n wayyur-a n Remḍan.

Amur ameqran seg yiminigen-a usan-d seg tmura n Tuṛuft, maca llan daɣ wid ay d-yusan seg Yiwanaken Yeddukklen d Kanada. « Sin n wussan aya seg wasmi ur ḍḍiseɣ ara imi ay d-usiɣ seg Atlanta, seg Yiwanaken Yeddukklen, yerna beddleɣ asafag deg Paris akken ad d-kemmleɣ abrid taṣebḥit-a ɣer unafag n Lezzayer », ay d-yenna Samir ay d-yusan ad yekk temḍan deg ugman-nnes deg Buzerriɛa, deg uḥric unnig n tmaneɣt.

Aṭas seg-sen ay d-iqelɛen aseggas-a seg Paris, Marseille, Dduḥa, London, Barcelona, Lqahira d yimukan niḍen akken ad kken Remḍan d twaculin-nsen deg Lezzayer. Tiwaculin ay la yettṛajun wid-nsen, qqiment ttwalint s ccuq tifelwiyin n wawwaḍ n yisafagen akken ad ẓren melmi ara d-awḍen.

Isafagen la d-ttawḍen wa deffir wayeḍ, yerna Idzayriyen ay d-yewwḍen seg Lalman xelḍen d wid ay d-yewwḍen seg Fṛansa deg tzeɣɣa talemmast n wawwaḍen deg unafag d tnedda anda ay ḥebsen yiṭaksiyen.

Akken ma llan nnan-d d akken smenyafen « ad kken Remḍan deg Lezzayer, am yal aseggas ». Hafid ay d-yusan seg Paris, yewweḍ-d s yiwen n uceryun yeččuṛen d tibalizin, yerna yenna-d d akken yessahel imuras-nnes n useggas akken ad d-ɣlin deg Remḍan akken ad ten-yekk d twacult-nnes. Wid ay netter nnan-aɣ-d daɣ d akken ur zmiren ara akk ad beddlen Remḍan deg tmurt s Remḍan deg yinig. « Iban d akken deg uzɣar llan aṭas n Yinselmen wukud nezmer ad nekk ayyur-a, maca acemma ur yezmir ad yawi amkan n umyager aḥmayan d wayt twacult deg ssehṛat yettɣimin s teɣzef n yiḍ », ɣef waken ay d-yenna Salim ay d-yeddukklen d wakk ayt uxxam-nnes.

Yiwen n Udzayri niḍen ay yeddren azal n 20 n yiseggasen deg Paris, yenna-d d akken maci d tikkelt tamezwarut deg ara d-yas ad yekk Remḍan d twacult-nnes deg taddart-nnes deg Lemdeyya. Said yenna-d d akken ula ma llan aṭas n Yinselmen anda ay yezdeɣ deg Fṛansa, ur yezmir ara ad ixemmem ad yuẓam deg tmurt niḍen menɣir tamurt-nnes.

Akk Idzayriyen tecrek-iten yiwet n tɣawsa: ḥemmlen akk ad ɛerḍen lbennat tiwḥidin n ssehṛat n Remḍan, yerna nnan-d akk d akken ur zmiren ara ad d-afen ṛṛuḥ n twacult am wa deg uzɣar, acku ala deg Lezzayer ay zemren ad ḥulfun i lbenna-nni n « zik ». 

 

Aṭas seg-sen ay yettwalin d akken sɛan zzheṛ imi ay ten-id-iṣaḥ ad kken Remḍan d twaculin d yimeddukal-nsen. Iminigen idzayriyen deg uzɣar ttwalin daɣ d akken yuklal imi ara d-asen deg Remḍan ɣer Lezzayer imi tallit-a teɣli-d daɣ deg wakud deg igerdan wwin imur-as yerna tebda-d tallit n unebdu deg tmurt, d tin iwatan i terza ɣef twacult.

 

Llan ula d imawlan ay d-yennan d akken arraw-nsen beddun ttuẓamen Remḍan deg tmurt n lejdud-nsen, yerna d aya ay asen-d-yettaǧǧan lbenna d tawḥidt deg ttejṛiba-a.

 

Ma d wid ur d-iṣaḥ ara ad kken ayyur s lekmal-nnes, zemren meqqar ad qqimen kra n wussan seg wayyur-a d twaculin-nsen, yerna ma sɛan zzheṛ, ahat, ad kken yid-sen lɛid deg Lezzayer.

 

 

 

 

 

Anafag agraɣlan n Lezzayer: Awwaḍ n « yiminigen » akken ad kken ayyur n Remḍan « deg tmurt »
  Yeffeɣ-d ass n : Akwas, 18 Yunyu 2015 12:30     Taggayt : TIMETTI     Ɣran-t : 111 n tikkal   Bḍu