Menu principal

Menu principal

Tiɣri i unadi ɣef wammaken yelhan ugar i umennuɣ mgal twuɣa tinmettiyin deg uɣerbaz

Yeffeɣ-d ass n : Asimwas, 07 Fuṛaṛ 2020 14:05   Ɣran-t : 0 n tikkal
Tiɣri i unadi ɣef wammaken yelhan ugar i umennuɣ mgal twuɣa tinmettiyin deg uɣerbaz

TIXENCELT – Gren-d tiɣri, yimedrawen deg yiwen n wass n usefrey, ass n ukwas (lexmis) deg Txencelt, i unadi ɣef tsemsedda yelhan ugar i umennuɣ mgal twuɣa tinmettiyin deg uɣerbaz.

Ass-a n tezrawt tessuddes-it Tiddukla n Umennuɣ Mgal Twuɣa Tinmettiyin n twilayt n Txencelt ɣer yidis n tiddukla n « Oxygene » i usmal n tmerrit tawennaḍant, yella-d deg tesnawit n Segueni-Sadek, yernu wekkden-d deg-s, yimedrawen, dakken « akk imeggiyen n tmetti taɣarimt yessefk ad mahlen akken ad d-afen tisemsedda timuyafin akk i umennuɣ mgal twuɣa tinmettiyin deg uɣerbaz ladɣa imi ay d-yelfa dakken akk ayen yettewgen i lmend n waya iban-d dakken ur yenfiɛ ara ».

« Aseqdec n tehyifin d ayen ay yessawaḍen ibalmuden ad ḥulfun i uɛzal d usetḥi, ad ddren deg tegnit n lḥif ay izemren ad ten-tessiweḍ ɣer tenɣimant », ɣef wakken ay d-yenna ujudan Yacine Kenadi, aɣella n tlubayt n yigerdan n unegraw agelluyan n temsetla taɣelnawt n Txencelt, ay d-yefkan amedya n mennaw n temsal ayyes d-telha temsetla deg yiseggasen-a ineggura.

Yekcef-d daɣ ujudan-a dakken « ccil n tḥemliwin n usefrey ay gant tmehliwin yemgerraden, taddadanin sskanayent-d dakken aktamur n yiseqdacen n tehyufin deg uɣerbaz simal irennu akken ad yaweḍ aswir d aklisan ».

S waya, yebder-d tazrawt ay iga Usira Aɣelnaw n Umennuɣ Mgal Tehyufin ay d-yellan gar 17 d 21 Yebrir 2016 yernu d tin ay d-ikecfen dakken 54.000 n yibalmuden ay yesseqdacen tihyufin deg 426 n yiɣerbazen.

Ma d Hassiba Bekhouche, d tasnafsit deg wammas n udawi n yiseqdacen n tehyufin n twilayt n Txencelt, tenna-d dakken kra seg ssebbat ay yessawaḍen inubiyen ad ɛerḍen neɣ ad ssudren tihyufin d anadi ɣef tufrayin timaynutin d uɛaned n yimeddukal-nsen.

I usmekti, ttwaferqent tuḍfisin i usefrey n yimezrawen n tesnatwit n Segueni-Sadek ɣef yimihiten n tehyufin deg yijifeṛ n wass-a n tezrawt aydeg ttekkan yigensasen n tmehliwin n umesten aɣarim, tawennaḍt, imeẓla isɣananen, asegmi, tabniqt n tmesliwt n Usira n Yiɣsuren n Yilemẓiyen, aɣsur anagdud n tdawsa tamadust n Txencelt d uɣsur anagdud n usefrek n wammasen n umḍal atwilan.

 

Last modified on Asamas, 09 Fuṛaṛ 2020 11:07
Tiɣri i unadi ɣef wammaken yelhan ugar i umennuɣ mgal twuɣa tinmettiyin deg uɣerbaz
  Yeffeɣ-d ass n : Asimwas, 07 Fuṛaṛ 2020 14:05     Taggayt : TIMETTI     Ɣran-t : 0 n tikkal   Bḍu