Menu principal

Menu principal

Afrag n « Mosta Land »: Isekniyen n usmaɣ i yiksilen n Bengal

Yeffeɣ-d ass n : Asamas, 02 Fuṛaṛ 2020 13:08   Ɣran-t : 0 n tikkal
Afrag n « Mosta Land »: Isekniyen n usmaɣ i yiksilen n Bengal

MESTƔANEM – Afrag n umzel d yiɣersiwen n « Mosta Land » n Mestɣanem yewwi-d, seg melmi kan, isekniyen n usmaɣ aydeg ad ssersen deg-sen irran n Tefriqt d yiksilen n Bengal, ɣef wakken ay d-tenna tmehla n ufrag-a ass n ukwas (lexmis).

Tanemhalt n « Mosta Land », Samia Benmehal, tenna-d dakken d tikkelt tamezwarut aydeg ara ttwasqedcen yisekniyen n usmaɣ yernu aya ad yeǧǧ inerzafen ad ttwalin iɣersiwen iwaganen, ladɣa irran d yiksilen.

Tallunt tamaynut n yiɣersiwen iwaganen d tin aydeg ara ilin 13 n yirran ifriqiyen, gar-asen yiwen n warr d amecṭuḥ ay d-ilulen deg ufrag-a n yiɣersiwen, d 8 n yiksilen n Bengal, gar-asen yiwen n uksil d amellal yernu drus anda ay ttilin yiksilen imellalen deg yifergan n yiɣersiwen, ɣef wakken ay d-yenna unemhal n teklinit tabiḍarant n « Mosta Land », Benlakhdar Wassini.

Iɣersiwen-a ad rsen deg yiwet n tgennarit n usmaɣ yernu ad mahlen deg-s yimniren ara d-yefken tilɣa ɣef yiɣersiwen-a aydeg llan aṭas n wid ay d-ilulen deg ufrag-a aɣersiwan.

Rnan sɣenwen-d 6 n tallunin timaynutin niḍen deg ufrag n « Mosta Land », gar-asent 4 n tallunin tiwaculanin d unrar n wurar i yigerdan, ɣef wakken ay d-tenna Massa Benmehal.

Aṭas n yiɣersiwen imeččuganen umi bran deg wasun azgenlelli aydeg llant snat n tallunin yesɛan tajumma tummidt n 4 n yiqeṭṭaren yernu d tin adeg zemren ad ddun yiɣersiwen deg twennaḍt icuba tawennaḍt-nsen tagamant, ɣef wakken ay d-txebber.

Afrag n « Mosta Land » yesɛa daɣ agelmim agemdan, d wa ay d agelmim amezwaru n tewsit-a deg yifergan iɣersiwanen n Lezzayer yernu din aydeg zemren ad afen medden ama d igḍaḍ iminigen, ama d igḍaḍ imezdaɣen. Agelmim-a yewweḍ uktamur-nnes n uwjad ɣer 80%.

« Mosta Land » yesɛa anrar n wurar i yimengaḍen d yigerdan d unrar n wuraren iwamanen (Kharouba Aquaparc), tallunt i waddalen imekniyen d wurti n yiɣersiwen aydeg llan 100 n yiɣersiwen seg 36 n tlemsin. Amḍan n yinerzafen-nnes yerna seg wasmi ay yerẓem, deg Yulyu n 2017, seg 610.000 ɣer 1,2 d amelyun deg 2018. Deg 2019, rzan-d fell-as 1,5 d amelyun n yinerzafen. 

 

 

Last modified on Asamas, 02 Fuṛaṛ 2020 15:17
Afrag n « Mosta Land »: Isekniyen n usmaɣ i yiksilen n Bengal
  Yeffeɣ-d ass n : Asamas, 02 Fuṛaṛ 2020 13:08     Taggayt : TIMETTI     Ɣran-t : 0 n tikkal   Bḍu