Menu principal

Menu principal

Tanezduɣt n LSP: kra n medden ṭṭfen-d tanezduɣt-nsen ugar n 10 n yiseggasen seg wasmi ay mmeṛkan deg twilayt n Lezzayer

Yeffeɣ-d ass n : Akras, 03 Yunyu 2015 12:21   Ɣran-t : 403 n tikkal

LEZZAYER TAMANEƔT – 2031 n twaculin ay d-yesfaydin seg tnezduɣt tanmettit-tattekkant (LSP) yerna ṭṭfen-d tisura n yixxamen-nsen, ɣef wakken ay d-nwala. Tiwaculin-a llant zedɣent deg tɣiwanin n Ɛin Lbenyan, Asaka n Qsenṭina d Dṛaṛya.

« Ssutureɣ ssmaḥ seg wid yemmeṛkan yerna ttṛajun tanezduɣt-nsen ugar n 12 n yiseggasen aya. Ahil n LSP n Lezzayer Tamaneɣt yeḥbes kra n wakud yerna iɛeḍḍel aṭas akken ad d-yewjed », ɣef wakken ay d-yenna uwali Abdelkader Zoukh, ay yesselwin tafagla n tukci n tsura deg Tqubbet n usuddis ulimpi n Mohamed Boudiaf.  

Ma tiwaculin niḍen ay yemmeṛkan yerna mazal ttṛajunt tanezduɣt, Mass Zoukh iṛeggem-asent ad asent-yefreq tinezduɣin-nsent cwiṭ, cwiṭ, seg yimir-a ɣer 2016, am wakken ay d-iger tiɣri i tkebbaniyin ay ibennun tanezduɣt akken ad ɣiwlent deg yixeddimen-nsent n lebni akken ad d-swejdent tinezduɣin-a ɣef zik lḥal.

Ahil n LSP n twilayt n Lezzayer d win deg llan 42.248 n tnezduɣin, gar-asen 11.709 ttwaferqen deg tgara n 2014, ɣef leḥsab n tecrawt ay d-tefka tmehla n tnezduɣt n twilayt ay iṛeggmen ad ternu ad tefreq 11.884 n tnezduɣin deg 2015 d 15.304 deg 2016.

Nnig waya, tenna-d tmehla-a d akken werɛad ur d-bdin ara yicanṭiyen n lebni n 3351 n tnezduɣin niḍen (8% seg wahil-a).

Seg yidis niḍen, seg gar 11.884 n tnezduɣin ay d-ṛeggmen i 2015, ala 2031 ay yettwaferqen ɣef twaculin timsutrin.

« Ad neg akk ayen umi nezmer akken ad nefreq 9.000 n tnezduɣin-nni ay d-yeqqimen seg yimir-a ɣer tgara n 2015 », ɣef wakken ay d-iwekked Mass Zoukh. 

Awjad n wahil n tnezduɣt n LSP yewweḍ ɣer 50%, ɣef wakken ay d-yenna uwali, am wakken ay yesteɛṛef d akken werɛad ur d-ufin ara amkan deg ara bnun kra n tnezduɣin seg ṣṣenf-a.

Aṭas seg wid ay d-yesfaydin seg tnezduɣin-a mmeṛkan deg 2000. « Lliɣ werɛad ur zwijeɣ ara deg 2000, asmi ay sserseɣ akaram-inu n tnezduɣt n LSP. Seg wass-nni ɣer wass-a, zewjeɣ yerna sɛiɣ taqcict ay la yeqqaren deg uɣerbaz alemmas », ɣef wakken ay d-tenna yiwet n tmeṭṭut mi teḍḍef tisura n uxxam-nnes.

 

 

 

Tanezduɣt n LSP: kra n medden ṭṭfen-d tanezduɣt-nsen ugar n 10 n yiseggasen seg wasmi ay mmeṛkan deg twilayt n Lezzayer
  Yeffeɣ-d ass n : Akras, 03 Yunyu 2015 12:21     Taggayt : TIMETTI     Ɣran-t : 403 n tikkal   Bḍu