Menu principal

Menu principal

Tafriqt d waḍḍan n Covid-19: Yessefk ad tili tgadda deg wayen yerzan afṣad

Yeffeɣ-d ass n : Asamas, 23 Mayu 2021 11:28   Ɣran-t : 1 n tikkal
Tafriqt d waḍḍan n Covid-19: Yessefk ad tili tgadda deg wayen yerzan afṣad

ADDIS ABABA – Yenna-d uneɣlaf azzayri n yiweẓla iwerdaniyen, Sabri Boukadoum, ass n usiḍyas, dakken yella-d lexṣaṣ usedger n tgezzayt mgal waḍḍan n Covid-19 deg Tefriqt, yernu yessefk ad yefru wugur-a war leɛḍil, am wakken ay d-icaɣli mgal yisemda ibumzelgen ay izemren ad d-kken seg unmezgi aqessḥan ɣef tgezzayin d wayen yettwasemman « taẓraɣlant tagezzayant » yernu yezmer ad iḍurr waya taɣellist n yimdanen deg umenẓaw afriqi.

 

Deg tgermant-nnes deg temlilit n Useqqamu n Talwit d Tɣellist n Tdukli Tafriqit ɣef usefrek n tkaɣreft n Covid-19 deg Tefriqt, iwekked-d Mass Boukadoum dakken « tamsalt n lexṣaṣ n tgadda deg wawwaḍ ɣer tgezzayin d yicqirrwen yellan deg waya (ɣef tɣellist talsant deg umenẓaw) yessefk ad d-nelhu yid-s yernu war leɛḍil ».

 

I lmend n waya, yenna-d uɣella n tdiplumatit tazzayrit, ay yesselwin timlilit-a, dakken imir-a « ttbanen-d yicqirrwen d imaynuten ɣef lǧal n tergadda deg wayen yerzan awwaḍ ɣer tgezzayin » mgal waḍḍan n Covid-19, yernu yenna-d dakken timura tifriqiyin d timezwura ay yenḍeren seg wayen umi semman, ass-a, « taẓraɣlant tagezzayant ».

 

Ifureṣ daɣ tagnit uneɣlaf akken ad d-yessenfali afḍam-nnes deg wayen yerzan lexṣaṣ n tgezzayin ussan-a. « Steɛṛfen akk yidisan, s umata, dakken yella lexṣaṣ deg tgezzayin, d acu kan, a win yufan, akk timura ad tent-id-ṣaḥent tnectiwin n tgezzayt ɣef leḥsab n tɣerfa-nsent akken ad feṣdent tigrawin tuzwiranin, d acu kan, mi ara nwali ayen iḍerrun deg unrar, nettḥulfu i ufḍam d ameqqran », ɣef wakken ay d-yesḥassef.

 

Yesḥassef daɣ Mass Boukadoum ɣef « unmezgi aqessḥan yellan ɣef tgezzayin yernu d aya ay yeǧǧan mennaw n tmura ad d-sɣent tinectiwin yugaren s waṭas anect ay srint, dɣa d aya ay yeǧǧan timura niḍen, ladɣa timura n Tefriqt, ad ṛwunt lḥif deg wayen yerzan amesten n yimahalen-nsent n tdawsa d tegrawin-nsent tuṛhifin ».

Tafriqt d waḍḍan n Covid-19: Yessefk ad tili tgadda deg wayen yerzan afṣad
  Yeffeɣ-d ass n : Asamas, 23 Mayu 2021 11:28     Taggayt : TADAWSA-TUSSNA-TASNATWILT     Ɣran-t : 1 n tikkal   Bḍu