Menu principal

Menu principal

Ameɣrus Djilali Bounaama d yiwen seg yiɣellaten imeqranen n Twilayt Tis IV

Yeffeɣ-d ass n : Asamas, 07 Ɣuct 2022 17:02   Ɣran-t : 2 n tikkal
Ameɣrus Djilali Bounaama d yiwen seg yiɣellaten imeqranen n Twilayt Tis IV

LEBLIDA – Ameɣrus Djilali Bounaama, yettwassnen s « Ssi Muḥemmed » niɣ « Arr n Waresnis », yella, ɣef wakken ay t-id-gelmen yimjahden n Twilayt Tamezruyant Tis IV, d yiwen seg yiɣellaten iredsanen imeqranen akk ay iḥekmen tawilayt-a, yernu wekkden-d dakken ameɣrus-a ibedd deg wudem n usehras afṛansi ama s tmussni-nnes taredsant, ama s tmussni-nnes tasertant.

Deg yiwet n tdiwennit d Tnegga n Yisalan n Zzayer i lmend n umulli wis 61 n tmettant-nnes deg yimenɣi, amjahed Mahmoud AIssa El-Bey, gma-s n umeɣrus Khaled Aissa El-Bey, yeɣlin deg yiger n yiseɣ ɣer 20 n yiseggasen ɣer yidis n Uknaner Djilali Bounaama, iwekked-d dakken aneggaru-a yella yesseḥbibir akken ad yeḍmen asileɣ n tɣara ama seg yidis aredsan, ama seg yidis asertan niɣ adiplumati i wakk imjahden, ladɣa wid ay yellan bɣan ad alin ɣer udrar.

Amjahed El-Bey (84 n yiseggasen) yenna-d dakken Ssi Muḥemmed, ay ilulen de 1926, yella yettwasseqneɛ dakken ala tigawt taredsant, tasertant d tdiplumatit yeddukklen ara izemren ad tessiweḍ Zzayer ɣer uzarug.
Seg yidis niḍen, yenna-d dakken adeg aydeg ttwameḍlen gma-s Khaled Aissa, Djilali Bounaama d wakk imeɣrusen ay yemmuten ɣer yidisan-nsen werɛad ur t-id-kcifen ara yiduba ifṛansiyen, yernu yesḥassef imi ar ass-a werɛad yettwassen.

Ma d amjahed d ufesyan aqbur n Tredsa n Uslelli Aɣelnaw deg temnaḍt n Leblida, Si Maamar Djgaguen, iwekked-d dakken Djilali Bounaama yella d « argaz abɣas, d amesferfan amekdi yernu d amalway n tidet ».

Djilali Bounaama yeṭṭef Tawilayt Tis IV Tamezruyant deg tegnit d « taweɛṛant » akken kan ay d-yettwasummed ɣef yiɣef-nnes, yernu yesmuteg-d aɣawas n usileɣ n yimjahden ara izemren ad gen tuɣdaḍin deg uzɣar, sakkin, ayyur seg wasmi ay yettwasnes uɣawas-a, bdan ttaṭṭafen-d yiɣellaten n twilayt imrigen seg Lalman, Ṭṭalyan d Čikusluvakya, ɣef wakken ay d-yenna.

Yerna-d umjahed-a dakken Djilali Bounaama yella yesɛa azrak d ameqran i waggagen yernu yella ur yettkukru ara ad ten-iciweṛ i tira n yiḍrisen i Tegrawla niɣ tibṛatin i tannayt tanagdut, am wakken ay d-yerna dakken ameɣrus-a yurar « tamlilt d tameqrant » deg usgerɣel n temsalt tazzayrit s yinermisen ay yella yesɛa-ten d yineɣmasen iwerdaniyen.

 

D aɣella aredsan, d asertay yeggucclen

 

Arr n Waresnis yerra Tawilayt Tis IV Tamezruyant d tamegdelt ur yezmir ad tt-yadef usehras afṛansi, yernu deffir ma yeqqel d afesyan aredsan, yessers tiyunin n tyita ɣef tlisa n twilayt-a.

Uqbel ma yuli ɣer udrar, yudef ɣer Umussu i Unalak n Tlelliyin Timegdayin, sakkin yudef ɣer Tuddsa Tuzzigt.

Yeqqim d urmid deg tsertit yernu yessuddes, deg 1951, asunded amatu n yimnaɣzen ay yeqqimen semmus n wussan. Yuɣ lḥal, tagnit taweɛṛant aydeg tedder twacult-nnes d tin ay t-iḥettmen ad yeǧǧ aɣerbaz ɣef zik lḥal akken ad imahel deg unaɣez.

Mi yenker Umgaru n Uslelli Aɣelnaw, Djilali Bounaama yudef ɣer Terni n Uslelli Aɣelnaw yernu, deg 1957, yettwasmel d amenzaḍ n Wasun Wis III n Twilayt Tis IV Tamezruyant.

Aseggas sakkin, yeqqel d amaslaḍ deg Useqqamu n Twilayt Tis IV s yisem-nnes d aɣella aredsan ɣer yidis n Ssi Mhamed Bouguerra.

Mi yemmut Ssi Mhamed Bouguerra, yeɣlin deg yiger n yiseɣ, Aknaner Djilali Bounaama ikemmel, ɣer yidis n Ssi Ṣaleḥ, yessefrak Tawilayt Tis IV.

Sakkin, yessuddes timhal tiredsanin ay yefkan ixeṣṣaren d imeqranen i usehras afṛansi, ama seg yidis n tenga, ama seg yidis n yiserdansen, yernu yefren tamdint n Leblida, yellan deg wul n Mettijet, akken ad yessers ansa n unzaḍ n twilayt-a.

Ula ma imawlan-nnes ttwenɣen, gma-s ameqran yettwabeẓ yernu tessedrem-asen tredsa tafṛansit axxam-nsen s tin n ttaṛ, Ssi Muḥemmed ikemmel amennuɣ-nnes i tlelli d uzarug n Zzayer armi d asmi ay yeɣli deg yiger n yiseɣ ass n 8 Ɣuct 1961, asmi ay d-tufa tredsa tafṛansit ansa-nnes n unzaḍ.  

Aknaner yeɣli deg yiger n yiseɣ ɣer yidis n Khaled Aissa Bey, Abdelkader Ouadel d Mustapha Naimi, deffir ma yella-d yimenɣi d ukriḍ mgal tyunt taredsant tuzzigt n Kuṛsika ay d-uznen s ddemma akken ad tenɣ tagrawt-a, deg wakud aydeg Mohamed Teguia d Mohamed Boumehdi ttwabẓen.

Djilali Bounaama, d asertay yeggucclen, yedrew deg usuddes n tmeskanin n 11 Dujembeṛ 1960 deg Temdint n Zzayer yellan, deg tallit-nni, teqqen ɣer Twilayt Tis IV.

Deg 2016, ssersen-as asebdad n ubṛubz deg Bab Zzayer, deg tlemmast n temdint n Leblida, i lmend n umulli wis 55 n tmettant-nnes.

 

Last modified on Asinas, 09 Ɣuct 2022 15:17
Ameɣrus Djilali Bounaama d yiwen seg yiɣellaten imeqranen n Twilayt Tis IV
  Yeffeɣ-d ass n : Asamas, 07 Ɣuct 2022 17:02     Taggayt : TIMNAḌIN     Ɣran-t : 2 n tikkal   Bḍu