Deg terzi-nnes ɣef teɣsert n tussda n Med-Gaz yellan deg Sidi Ǧellul (taɣiwant n Sidi Ṣafi), yenna-d uneɣlaf dakken « asseɣzef n uselda-a n 48 n yikemzen ay la bennun gar Leɛrica (deg Nnɛama) d Bni Ṣaf (deg Ɛin Timucent) yesɛa tixxutert d tameqrant, ladɣa imi ay yesɛa 197 n yikilumitren yettewgen s tetwilt ay iḍemmnen amleɣwi yelhan ugar » i yiseladen ara yettwaqqnen.

Iwekked-d daɣ uneɣlaf ɣef tḍullit n ussewjed n usenfar-a deg umenḍar ay as-d-yettwassefran ladɣa imi ay d axatar i tmurt-nneɣ imi ara yessiǧew urrig ɣer Meṛṛuk d Spenyul.

D Cosider d Transcanal ay d-yelhan s usseḍru n usenfar-a ay yewwḍen ɣer uktamur n ufara n 6% yernu ad d-yewjed deg Ctembeṛ n 2020, ɣef wakken ay as-d-ssegzan i uneɣlaf.

Ableɣ n ussiǧew n wurrig seg teɣsert n Med-Gaz ɣer Spenyul yewweḍ ɣer 7,3 n yimelyaṛen n yimitren igasasen ilindi s uselda n wurrig awlal n temdint n Bni Ṣaf (Ɛin Timucent) ɣer Almeria (Spenyul). Izirig-a yettwabna deg 2011.