Deg wass n 4 Wamber 1979, azal n 9 n wayyuren seg wasmi ay d-tella Tegrawla Tiṛanit, udfen kra n yinmeskanen yeddan d tegrawla ɣer tesɣimt n tmazelt tamarikanit deg Ṭehran yernu ṭṭfen 52 n Yimarikaniyen yettmahalen d inawaren deg tmazelt. Tuṭṭfa-a n yimeṛhan teqqim 444 n wussan yernu d tin aydeg assaɣen gar Yiwanaken Yeddukklen n Temrikt d Iṛan udfen deg tezɣent tadiplumatit yettkemmilen ar ass-a.

Sin n wussan deffir unṭag ɣef tmazelt, Aseqqamu Agrawlan Islaman yeṭṭef adabu yernu yenna-d dakken yugi ad yessenz apitṛul iṛani i Yiwanaken Yeddukklen akken ad d-yerr ttaṛ ɣef ugdal ay tegdel Washington ifarisen n usuder n Iṛan yernu tenna-d dakken tesbek idrimen iṛaniyen yersen deg tbankiwin timarikaniyin.

Deffir ma turem tedbelt tamarikanit ad d-teslelli imeṛhan-nni nettat s timmad-nnes yernu ur ast-tečči ara, yeqbel unabaḍ iṛani ad yesteg d Yiwanaken Yeddukklen s tebdammast tazzayrit s tewtilt ad d-ttwaslellin yimeṛhan imarikaniyen s uslelli n yidrimen iṛaniyen yettwasebken deg Yiwanaken Yeddukklen.

Ussisen tga tegrawt n yidiplumatiyen izzayriyen ddaw tmehla n umeṛḥum Mohamed Seddik Benyahia d ayen ay yessawḍen ɣer uzmal, deg Zzayer Tamaneɣt, n umtawa n Zzayer deg wass n 19 Yennayer 1981, gar Yiwanaken Yeddukklen d Iṛan, yernu d wa ay d amtawa ay yefran taluft s uslelli n yimeṛhan-nni azekka-nni kan.