Menu principal

Menu principal

Asarag n « Tsentayt i Urkad n Libya »: Addud n Zzayer « dima yella-d d afraray »

Yeffeɣ-d ass n : Asimwas, 22 Tubeṛ 2021 10:01   Ɣran-t : 1 n tikkal
Asarag n « Tsentayt i Urkad n Libya »: Addud n Zzayer « dima yella-d d afraray »

ZZAYER TAMANEƔT – Iwekked-d uneɣlaf n iweẓla iwerdaniyen, Ramtane Lamamra, ass n ukwas seg Ṭrables, dakken addud n Zzayer deg wayen yerzan tazɣent talubit « dima yella d afraray yernu d imezgi » yernu wa d addud yekkaten ɣef « uḥraz n tnaya d tdukli tagelluyant n Libya » d unadi ɣef uferru n tezɣent-a gar Yilibiyen.

« Addud n Zzayer deg wayen yerzan tazɣent n Libya dima yella d imezgi yernu d afraray. Aselway n tegduda, Abdelmadjid Tebboune, iger-d tiɣri i uḥraz n tnaya d tdukli tagelluyant n Libya d tawert n tgermant deg yiweẓla-nnes igensiyen », ɣef wakken ay d-yenna Mass Lamamra deg tgermant-nnes deg usarag n « Tsentayt i Urkad n Libya » ay ireẓmen ass n ukwas deg Ṭrables.

« Zzayer twekked-d, acḥal d tikkelt, dakken aferru n tezɣent yessefk ad d-yili s ukala n ustag gar Yilibiyen, d win aydeg aytmaten ilibiyen yessefk ad uraren tamlilt d taxatart deg ukatar n udiwenni aydeg ara derwen akk yidisan ay terza temsalt, d adiwenni ara iḍemnen allus n tmeṣkiwt d usdukkel n wakk tisuda yernu ad yeḥrez amsuɣal aɣelnaw ».

« Zzayer tummar s ufara ay d-yellan deg ukatar n ukala asertan ay d-yellan ddaw usiggi n Tuddsa n Yiɣlanen Yeddukklen, d win ay yessawḍen ɣer ufran n uselway d yimaslaḍen n Useqqamu Aselwayan d Unabaḍ n Tdukli Taɣelnawt yernu yesbeḍ-d azemz n 24 Dujembeṛ 2021 i usuddes n tefranin timuta », ɣef wakken ay d-yenna.

Mass Lamamra yessenfali-d daɣ adwat n Zzayer deg wayen yerzan arkad deg tegnit taɣellisant deg Libya seg wasmi ay yettwazmel umtawa n usebded n yimenɣi deg Libya, am wakken ay d-iḥettet dakken yessefk « ad faken akala aredsan d uɣellisan s umuqqen i lmend n ugdal n yimrigen d ujbad n yiɣallen, imkariyen d yimenɣan iwerdaniyen seg Libya », yernu ad d-yili waya s umciweṛ d yineblagen iwerdaniyen ay terza temsalt d udraw n tmura tinaragin n Libya deg yidiwenniyen, am wakken ara d-yili daɣ waya deg ukatar n tegrayin ay d-yellan deg temlilit taɣlifant n tmura tinaragin n Libya ay d-yellan deg Zzayer ussan n 30 d 31 Ɣuct 2021.

Asarag n « Tsentayt i Urkad n Libya »: Addud n Zzayer « dima yella-d d afraray »
  Yeffeɣ-d ass n : Asimwas, 22 Tubeṛ 2021 10:01     Taggayt : AMAḌAL     Ɣran-t : 1 n tikkal   Bḍu