Menu principal

Menu principal

Tasɣunt n Naqd tessuffeɣ-d uṭṭun uzzig ɣef wasaḍ arifi Ɛbedlekrim Lxeṭṭabi

Yeffeɣ-d ass n : Akwas, 22 Yulyu 2021 12:21   Ɣran-t : 0 n tikkal
Tasɣunt n Naqd tessuffeɣ-d uṭṭun uzzig ɣef wasaḍ arifi Ɛbedlekrim Lxeṭṭabi

ZZAYER TAMANEƔT – Tessuffeɣ-d tesɣunt n Naqd, yemmuzzgen deg temsal tinmettiyin, yiwen n wuṭṭun d uzzig i usfugel n umulli wis 100 n tmiwta tamezruyant n Anwal aydeg d-yerna unazbay amɣarbi Ɛebdelkrim Lxeṭṭabi taredsa taspenyulit.

« Ass n 21 Yulyu 1921, yerna Muḥemmed U Ɛbedlekrim Lxeṭṭabi, taredsa tahersant taspenyulit yellan ddaw tmehla n ujiniṛal Sylvestre. Taredsa d umun asertan n Spenyul walan aya d tawaɣit, ma d tamnaḍt n Rrif, deg Meṛṛuk, twala tadyant-a d tamanegt aydeg d-yeflali wasaḍ d agraɣlan », ɣef wakken ay d-tenna tesɣunt n Naqd.

Amussu n uzbu n Muḥemmed U Ɛbedlekrim yettgensis-d « anfus deg yimussa n uzbu ay d-yellan uqbel i uḥbas n uwdag awerdani ». Aya ur d-yelli ara kan d amennuɣ mgal unbaẓ « amasiḥi », wanag yella-d daɣ d amennuɣ mgal wammad ay ttamden Wuṛufiyen tibuɣar n tmura niḍen, am wakken ay d-yekka Muḥemmed U Ɛbedlekrim nnig tekti n tewsit yernu yessuli aswir ɣer tekti n « uɣlan ».

Ɛbedlekrim yessawel-d ɣef « uzarug n Rrif » imi Spenyul tella werɛad ur tewdig ara tamnaḍt-a, yernu yella yettwali dakken azarug n uwanak arifi d asurif amezwaru i uslelli n wakk tamurt n Meṛṛuk d Lmeɣreb Ameqqran seg usehres.

Yella yessaram, ɣef wakken ay d-yebder umagrad-a, akken tanekra ay d-yellan deg Rrif ad tezreɛ deg temnaḍin niḍen akken ad d-nekrent, ula d nitenti, mgal uwdag awerdani.

Amussu n uslelli ay d-yebda lamir Ɛbedlekrim twala-t Fṛansa tahersant d amihi maci ala ɣef Meṛṛuk wanag ɣef wakk Tafriqt n Ugafa imi Fṛansa tella tettwali dakken mer ad tawi Meṛṛuk azarug, zemrent ula d Zzayer d Tunes ad awint azarug.

Aseggas n 1921 nettwali-t d aseggas n twelha yernu Muḥemmed U Ɛbedlekrim Lxeṭṭabi d anẓa ameqqran deg umennuɣ i uslelli n yiɣerfan yeddren ddaw uzaglu ahersan, ɣef wakken ay tt-id-yextem umagrad-a.

Muḥemmed Ɛbedlekrim Lxeṭṭabi yella d anazbay amɣarbi, tizert-nnes seg temnaḍt n Rrif, deg ugafa n Meṛṛuk. Ilul deg tizi n 1882 deg Ujdir, deg tewsit n Ayt Weryaɣel. Yennuɣ yernu yerbeḥ tamiwta n Unwal. Sakkin, deg 1925, yessuddes azbu mgal uwdag afṛansi. Deg 1926, Ɛbedlekrim yettwaḥettem ad yennejli yernu yekka tagara n tmeddurt-nnes deg Maṣer anda ay yemmut deg 1963. Mazal-it ar ass-a yettwamḍel deg umkuẓ ay d-ḥazen i wasaḍen aɛṛaben deg Lqahira imi iduba imeṛṛukiyen mazal ugin ad d-awin tafekka-nnes ɣer temnaḍt aydeg d-ilul, deg Rrif.

 

Last modified on Asamas, 25 Yulyu 2021 11:01
Tasɣunt n Naqd tessuffeɣ-d uṭṭun uzzig ɣef wasaḍ arifi Ɛbedlekrim Lxeṭṭabi
  Yeffeɣ-d ass n : Akwas, 22 Yulyu 2021 12:21     Taggayt : AMAḌAL     Ɣran-t : 0 n tikkal   Bḍu