Menu principal

Menu principal

Zzayer tebna tidumṣukin d tixatarin deg ugzum n yimesni

Yeffeɣ-d ass n : Asimwas, 29 Yulyu 2022 15:01   Ɣran-t : 27 n tikkal
Zzayer tebna tidumṣukin d tixatarin deg ugzum n yimesni

ZZAYER TAMANEƔT – Zzayer tebna tidumṣukin d tixatarin deg ugzum n umesni seg wasmi ay tewwi azarug, yernu yegla-d waya s ubaɣur d usrid ɣef tdamsa n tmurt d tmeddurt tayalast n yiɣermanen.

Deg tidet, awanak iṣerref aṭas n yidrimen deg ugzum-a axatar d usnuddsan yernu ussisen-nnes banen-d deg unrar s tmeṣkiwt n waṭas n yibriden, ibriden imazzalen, iẓeḍwa n ubrid n wuzzal, izirigen n uṭramway d umiṭru, inafagen d yisugan.

Mi tewwu Zzayer azarug, tella tesɛa aẓeḍwu d imlesses n yibriden, abrid n wuzzal d tdumṣukin n uzadur ay yellan, s umata, deg wasunen aydeg zedɣen yimharsen, deg wakud aydeg taɣerfa tazzayrit tella tedder deg tiggullelt d uɣḍas ummid.

I lmend n uqḍaɛ n uɛeṭṭel ay d-yellan deg 132 n yiseggasen n uwdag afṛansi d usedwet n yisraten n uwliwel n medden d yifarisen, fkan yiduba inagduden tixxutert d tameqqrant i yibriden.

Yewɛeṛ ad d-neg tacrawt d tummidt n yisenfaren ifuken deg ugzum n umesni deg wakk timnaḍin n ugelluy aɣelnaw, maca ad d-nebder, s tɣawla, tidumṣukin tigejdanin ay d-yellan deg tɣult-a.

Deg tɣult n yimahilen inagduden, tamurt tebna-d Abrid Amazzal Agmuḍ-Ataram s teɣzef n 1200 n yikilumitren, am wakken ay tebda aṭas n yibriden imazzalen, ibriden iɣelnawen, ibriden iruraden, ibriden imadafen d yibriden n tuqqna.

Tidumṣukin-a tibridanin d tid ay yeǧǧan Zzayer ad tesɛu aẓeḍwu abridan aɣezfan akk deg Tefriqt s 110.000 n yikilumitren,  deg wakud aydeg, deg 1962, tella tesɛa kan 73.000 n yikilumitren yernu ala 18.000 ay yellan ssan.

Ussis deg tmeṣkiwt n tdumṣukin tisagnanin d win ay yeǧǧan tamurt ad tesɛi 10 n yisagnen inezzanen, gar-asen kraḍ n yisagnen ipitṛulanen d wazal n 45 n yisagnen n umzel d usislem.

Tamurt tesɛa daɣ tanawt tawlalt n 14 n yiɣerruba imeqqranen i umesni n yilzazen (gar-asen sin d iɣerruba usligen iɣelnawen) d 3 n yiɣerruba n umesni n yimsiklen, am wakken ay tesɛa taṛmist n uṣeggem n yiɣerruba, yernu ahil yettwaḍfaren ass-a d win ara yeǧǧen Zzayer ad tesɛu 25 n yiɣerruba imeqqranen i umesni n yilzazen.

Deg wayen yerzan tidumṣukin tinafganen, tebna Zzayer 36 n yinafagen seg wasmi ay tewwi azarug, gar-asen 20 ttwamaden i umesni agraɣlan, ma d 16 ttwamaden i umesni agensi.

Amḍan n yisafagen ay tesɛa tmurt yewweḍ ɣer 70 yernu snat n teṛmisin ay ten-yettamden: Air Algerie (55) d Tassili Airlines (15).

 

Abaɣur anmetti-adamsan meqqren

 

Abrid n wuzzal d win yennegman daɣ s waṭas seg wasmi ay tewwi tmurt azarug. Zzayer, ass-a, tesɛa aẓeḍwu abruzzlan n 4.498 n yikilumitren yernu iḥuza-d 30 n twilayin, am wakken ay yessawaḍ ama d imsiklen, ama d ilzazen. Aẓeḍwu-a d yiwen seg wid yennegman akk deg Tefriqt.

Ahil abruzzlan ay d-smutgen yiduba unnigen n tmurt d win yettḥakaṛen ad yessiweḍ aẓeḍwu n tmurt ɣer 9.000 n yikilumitren yernu d win yekkaten ad yeqqen timnaḍin n ugafa n tmurt ɣer tid n unẓul uggig.

Daɣ, Zzayer tettmahal akken ad tessetres aẓeḍwu abruzzlan akken ad tesselhu asikel yernu ad tessenqes amdes d wahit n uzlay n yilawayen.

Asumer n umesni s ubrid n wuzzal yennerna deg yiseggasen-a ineggura s useḍru n yizirigen n uṭramway deg mennaw n tmedinin n tmurt (Zzayer, Wehṛan, Qsenṭina, Sḍif, Mestɣanem, Sidi Belɛebbas, Waregla), izirigen n umiṭru n Zzayer Tamaneɣt akked yimesniyen niḍen am uzaruɣan.

Isenfaren-a d wid ay d-yeglan s ubaɣur anmetti-adamsan d ameqqran ɣef tmurt yernu yedrew degh uselhu n tegnatin n uzlay, am wakken ay yesnerna armud d tinnuzɣa tadamsant n tmurt. Aya inezzeɣ-d daɣ imerrayen.

Yessefk daɣ ad nakez dakken isenfaren-a d wid ay ifuken aɣḍas n mennaw n temnaḍin tuɣḍisin, am wakken ay d-yerra azal i waṭas n tbuɣar tigamanin tidiganin d tɣelnawin. Amesni yesseɣnew-d daɣ aṭas n temras yernu yesselha tagnit n tmeddurt n tɣerfa.

Tasnuddest ay yeḍfer uwanak deg tɣula-a tefka-d igumma s umḍan yettnernin n yimdanen yesseqdacen abrid n wuzzal, ibriden ikalanen, asafag d uɣerrabu.

Iduba inagduden d teṛmisin n wammad n yiẓeḍwa-a d wid yettmahalen, ass-a, i uselhu n tɣara n umeẓlu, asemḍen n wakk imeẓla, asɣuni n yiskaren n umesni yemgerraden d ubdad i tlujistit n yimsemhal idamsanen.

Zzayer tebna tidumṣukin d tixatarin deg ugzum n yimesni
  Yeffeɣ-d ass n : Asimwas, 29 Yulyu 2022 15:01     Taggayt : TADAMSA     Ɣran-t : 27 n tikkal   Bḍu