Menu principal

Menu principal

Naftal: Asefti n wugar n 250 n yimelyaṛen n yidinaṛen deg 5 n yiseggasen ay d-itteddun

Yeffeɣ-d ass n : Asinas, 24 Mayu 2022 11:27   Ɣran-t : 2 n tikkal
Naftal: Asefti n wugar n 250 n yimelyaṛen n yidinaṛen deg 5 n yiseggasen ay d-itteddun

ZZAYER TAMANEƔT – Ixebber-d uselway-anemhal amatu n Naftal, Mourad Menouar, ass n uynas deg Zzayer Tamaneɣt, dakken taṛmist-a ad tessefti 250 n yimelyaṛen n yidinaṛen deg yisenfaren isnuddsanen, yernu ad d-yili waya gar 2022 d 2027.

Taṛmist n Naftal tesɛa aɣawas n usnegmu n semmus n yiseggasen (2022-2027) yersen ɣef tesnuddest i useḍru n yisenfaren d imeqqranen s tesqamt n 250 n yimelyaṛen n yidinaṛen, ɣef wakken ay d-ixebber Mass Menouar yellan d inebgi n tmugert n uyalas n Echaab.

Gar yisenfaren n usefti ay ssefran deg ukatar n uɣawas-a, yebder-d umasay-a asenfar n uselda n umesni n wurrig n upitṛul yettwasmengin seg Arzew ɣer Zzayer Tamaneɣt, d win ara yekken ɣef mennaw n temnaḍin n utaram d tlemmast n tmurt yernu ad yessigeẓ mennaw n temdinin s userɣu-a, am wakken ara d-yessenqes waya tasqamt n umesni s yiɣerruba.

Yebder-d daɣ uselway-anemhal amatu n Naftal asenfar niḍen n uselda ara imesnin aserɣu seg teɣsert n uɣeyyez n Skikda ɣer Zzayer Tamaneɣt s usigeẓ n mennaw n temdinin deg ubrid-nnes, am wakken ay d-iwekked dakken asenfar-a d win ay ittekken, imir-a, ɣef snat n takkayin, ti d timeṣkiwt n uselda n umesni n userɣu seg teɣsert n uɣeyyez n Skikda ɣer wammas n usmidel n Lɛelma (Sḍif) d takkayt tis snat yellan d amesni-nnes seg Lɛelma ɣer Zzayer Tamaneɣt.

Deg wayen yerzan asenfar-a, yenna-d umasay-a dakken « aḥric amezwaru n usenfar-a ssefran ad ifak ass n 5 Yulyu n useggas-a maca wexxren-t ɣer 1u n Wamber ɣef lǧal n kra n yimgiyen d tegnatin », am wakken ay d-iwekked dakken « d taṛmist n Naftal i yiman-nnes ay yessidrimen asenfar-a ».

Last modified on Akras, 25 Mayu 2022 11:57
Naftal: Asefti n wugar n 250 n yimelyaṛen n yidinaṛen deg 5 n yiseggasen ay d-itteddun
  Yeffeɣ-d ass n : Asinas, 24 Mayu 2022 11:27     Taggayt : TADAMSA     Ɣran-t : 2 n tikkal   Bḍu