Menu principal

Menu principal

Tukci n tuzwirt i ugmuḍ adamsan deg waǧaw n yizraren d yisgulaf n ufares yettwasqedcen

Yeffeɣ-d ass n : Aynas, 23 Mayu 2022 08:41   Ɣran-t : 3 n tikkal
Tukci n tuzwirt i ugmuḍ adamsan deg waǧaw n yizraren d yisgulaf n ufares yettwasqedcen

ZZAYER TAMANEƔT – Iwekekd-d uneɣlaf n temguri, Ahmed Zeghdar, ass n usamas deg Zzayer Tamaneɣt, dakken asaḍuf amaynu ay inebbḍen aǧaw n yizraren d yisgulaf n ufares yettwasqedcen d win yettafken « tuzwirt » i ugmuḍ adamsan, yernu akettur n ufares yessefk ad yettwaktazel s tenzagt n tmeddurt taddayant deffir uṣeggem n usgalef-nni.

Yenna-d uneɣlaf aya i lmend n urẓam n wass n uselɣu ay d-yellan i uciri n unagraw n waǧaw n yizraren n ufares yettwaṣeggmen d unagraw n usenfu seg tewsatin d tẓeṭṭaḍt n wazal yernan i yisegren d tnegwa timenza ay d-yettwaǧwen niɣ wid ay d-sɣan sɣur yimesdugten idiganen.

I lmend n waya, yenna-d Mass Zeghdar dakken sin-a n yinagrawen llan-d deg ukatar n « tsertit ay yesmemmi unabaḍ i useɣnew n twennaḍt iwatan yernu d tin ara iḍemnen ifujaren i usnegmu, asduqqes d usineḍ n tdamsa taɣelnawt ».

Sin-a n yinagrawen d wid ay d-yellan daɣ deg ukatar n yiswiyen ay d-yesmuteg uɣlif n temguri i usnegmu n temguri taɣelnawt s udhal d tmunit n teṛmisin i uselhu n tinnmezgit-nsent yernu aya d ayen ara iderwen deg usali n ufaris agensi anusem am wakken ara yeǧǧ Zzayer ad tessenqes tafatuṛt-nnes n waǧaw, ɣef wakken ay d-yerna.

Mass Zeghdar iwekked-d daɣ dakken anagraw n waǧaw n yizraren d yisgulaf n ufares yettwaṣeggmen yesɛa « tixxutert d tameqqrant » deg wayen yerzan asdusu n yiketturen n ufares aɣelnaw d usduqqes akked usineḍ n yirmuden imguranen s ufareṣ seg tlemmiẓin yellan deg wulzuzen igraɣlanen, ladɣa wid ay tḥuza tezɣent tadamsant tanmaḍalt ay yessawḍen ɣer umdal n waṭas n tneɣraf d usenzi n yisgulaf-nsent s watigen d inzaɣanen.

 

Last modified on Asinas, 24 Mayu 2022 11:51
Tukci n tuzwirt i ugmuḍ adamsan deg waǧaw n yizraren d yisgulaf n ufares yettwasqedcen
  Yeffeɣ-d ass n : Aynas, 23 Mayu 2022 08:41     Taggayt : TADAMSA     Ɣran-t : 3 n tikkal   Bḍu