Asenfar n usaḍuf-a amaynu yerzan asefti yessemned-it-id uneɣlaf n temguri yernu d win yessefrayen mennaw n wakaten i usekmem n yimirwen n uselway n tegduda yerzan aselhu n unezwi n usefti d uḍman n tegnatin iwatan i uslelli n yiziɣer n tsentayt d usineḍ n tdamsa taɣelnawt deg ukatar n tmuɣli tamakkit d turkidt ara yeddmen deg leḥsab tilelli n usefti, tiffrawent d tgadda s uzrak n tmenḍawt n 2020.

Tamuɣli-a d tin ay yeddmen deg leḥsab, ɣef leḥsab n ulɣu-a, allus n usuddes n ukatar asudan yerzan asefti yernu, deg ukatar n waya, Aseqqamu Aɣelnaw n Usefti ad yeslummes ɣef usumer, asemyuddes d uktazel n usnas n tsertit taɣelnawt n usefti.

Tanegga Taɣelnawt n Usnegmu n Usefti yettwassenfel-as yisem yernu teqqel d Tanegga Tazzayrit n Usmal n Usefti, am wakken ay as-yefka usaḍuf-a amaynu tamlilt n usmal d tmunit n yiseftiyen s useɣnew n tekwat tayiwnant ara yesɛun tissugra d taɣelnawt yernu d tin ara d-yelhun s yisenfaren imeqqranen d yiseftiyen iwerdaniyen, aseɣnew n tekwatin tiyiwnanin n usefti deg temnaḍin yemgerraden n tmurt d usdusu n tzemmar n yigensasen n wudusen d tdeblin tinagdudin ay terza temsalt.

Tanegga-a d tin daɣ ara yennaɣen mgal tbiruqraṭit s usemḍen n tsekkirin yerzan asefti s useɣnew n tɣerɣert tumḍint n yimsefti akked usuffeɣ -war leɛḍil- n tnaga n uklas n usenfar n usefti, ɣef wakken ay d-yerna uɣbalu-a.