Mass Djerad yeẓẓunẓa ameckaḍ amezwaru n tgemma deg Lezzayer, d win umi semman « Algeria Venture ». Yella-d waya deg Ufrag n Waḍu Ameqqran n Wlad Fayet (Dounia Parc) deg Lezzayer Tamaneɣt, yernu yenna-d uneɣlaf amenzu, i lmend n waya, dakken « adhal n usfar d teṛmisin tinesfarin yella-d gar tuzwirin n uselway n tegduda i usduqqes n tmudemt tadamsant tamaynut yersen ɣef tesnatwilt tamaynut d tdamsa n tmussni ».

« Iḥettet-d uselway n tegduda, mennaw n tikkal, ɣef wanaḍ n usemlili n wakk tignatin d wammaken yessefken akken ad ǧǧen tiṛmisin-a ad derwent deg ukala n usineḍ adamsan ay tettnadi tmurt », ɣef wakken ay d-yesmekti Mass Djerad.

Ass-a, Lezzayer tettqabal icqirrwen inmettiyen-idamsanen d ixataren ay yessefk ad frun s usidef n tmussni d usfar deg wakk timuɣliwin d tesnuddsin yerzan asnegmu, yernu ad d-yili daɣ waya s udhal n tgemma yesɛan anezmar d axatar deg unerni, am wakken ay d-yerna dakken yettwaheyya-d ukatar asuddsan d uzerfan i usegrer n yirmuden-a d useɣnew n usenduq n usefti i usidrem-nnes.

Aẓunẓu n temṣukt-a « yettwekkid-d adhal n unabaḍ i tgemma s uciri n umeckaḍ n tgemma s wammaken inganen d tmudemt n usefrek yeddan d tegna tigraɣlanin », dɣa d aya ara yettekkin deg udhal n wussisen n uwanak i usiweḍ ɣer tifratin d timenzugin ara yerren Lezzayer d tizgelt n usfar deg Tefriqt d temnaḍt, ɣef wakken ay d-yerna.