« Deffir ma slan aneskin n uneɣlaf n ugensu ɣef umuzel n tesmilt n tallalt i usbadu n yideggen, asmal n usefti, aseɣyed n tferka d waddad n tferka tamgurant, yumeṛ uselway n tegduda ad d-ssuɣalen akk inumayen imguranen, yellan s yigiman, ttwasdegren maca werɛad ur ttwamden ar ass-a », ɣef wakken ay d-yenna yiwen n ulɣu n tselwit n tegduda.

Aselway n tegduda yumeṛ daɣ s usedrew n yigensasen n yimseftiyen d yikerwaten deg usmal n usefti s yisem-nsen d icriken deg usnegmu yernu d imeggiyen igejdanen i usduqqes n tdamsa taɣelnawt.

Yumeṛ uselway Tebboune s uferru n wuguren ay d-yembabben seg yir asefrek n zik deg unrar n temguri s uḍfar n yiḍrisen izerfanen yerzan aɣad amaynu n tsertit tamgurant.

Deg ukatar n waɣaden-a yeqqnen ɣer usmal n usefti, yumeṛ daɣ uselway ad ilin wasunen n urmud ddaw tmaḍirt n yiselwayen n tɣiwanin akken ad d-sbadun israten n yal tamnaḍt yernu ad reẓmen abrid i teṛmisin n tesnatwilin timaynutin.