Menu principal

Menu principal

Ass Aɣelnaw n Tmedyezt: Ahil d anesbaɣur i yiriri n tejmilt i Moufdi Zakaria

Yeffeɣ-d ass n : Aynas, 15 Ɣuct 2022 12:49   Ɣran-t : 39 n tikkal
Ass Aɣelnaw n Tmedyezt: Ahil d anesbaɣur i yiriri n tejmilt i Moufdi Zakaria

ZZAYER TAMANEƔT – Tesmuteg-d Tdukli Tazzayrit n Tẓuriwin d Yidles ahil d anesbaɣur i usfugel n Wass Aɣelnaw n Tmedyezt gar 16 d 18 Ɣuct 2022 deg Zzayer Tamaneɣt, yernu yeɣli-d waya d umulli wis 45 n tmettant n umedyaz n Tegrawla Tazzayrit, Moufdi Zakaria, ɣef wakken ay aɣ-d-txebber, ass n usamas, tdukli-a ara yessuddsen tadyant.

Yenna-d uselway n Tdukkli Tazzayrit n Tẓuriwin d Yidles, Abdelali Mezghiche, i Tnega n Yisalan n Zzayer, dakken tadyant-a ad d-tili s umyalel d Tesbeddit n Moufdi Zakaria deg ukatar n wahil n yiseksal i usfugel n umulli wis 60 n uzarug, yernu tafugla-a ad d-tili i usfugel n Wass Aɣelnaw n Umedyaz d tajmilt i umeɣnas Moufdi Zakaria yellan d amutlay n Tegrawla Tazzayrit yernu d win ay d-iwekkden ɣef twegda d tmagit taɣelnawt.

Ad d-ɣren tamedyezt yernu ad d-ilin yisaragen deg tedyant-a. Ad asen-rren daɣ tajmilt i yimedyazen am Adem Fathi, Habiba Mohamadi, Mounira Saada Khelkhal, imsuqqel d umnadi Mohamed Arezki Ferad akked umedyaz amuriṭani Cheikh Abou Chadja.

Ad d-yili usarag ɣef usgum n « Tagrawla Tazzayrit, d aɣbalu n uhrag n yimedyazen seg umaḍal akk », yernu ad d-yili waya deg yiɣrem n yinaẓuren deg Zzradla.

Asarag-a d win aydeg ara d-ilint tgermanin ɣef « Takkayin tixatarin deg tmeddurt n Moufdi Zakaria », « Tasbeddit n Moufdi Zakaria, iseḍra d yicqirrwen », « Tagrawla Tazzayrit deg tmedyezt taɛiraqit », « Tagrawla Tazzayrit deg tmedyezt tasaɛudit », Tagrawla Tazzayrit deg tmedyezt taɛṛabt » d « Tsektiwin Tisertanin d Tẓuranin deg ccna agrawlan ».

Deg uxtam n tedyant-a, ad d-ttunefken yismawen n wid irebḥen yiwen n umsazwar n tmedyezt.

Moufdi Zakaria ilul s yisem n Zakaria Cheikh, ass n 12 Yunyu 1908 deg Wayt Yezgen (Taɣerdayt) yernu yezrew deg Ɛennaba uqbel ma yedda ɣer Tunes anda ay yezrew deg uɣerbaz n El Khaldounia d tesdawit n Zzeytuna. Deg 1926, yeqqel-d ɣer Zzayer.

Amur ameqran seg tṣekka-nnes yella-d ɣef umussu aɣelnaw, yernu yura-d ammuden n yisefra n « Tajajiḥt Tuqdist », « I Tili n Tzemrin », « Tahregt n Waṭlas » akked « Tilyadat n Zzayer », d asefru n 1001 n wafiren. D netta daɣ ay d-yuran « Qassaman », imseɣret aɣelnaw n Zzayer. Moufdi Zakaria yemmut ass n 17 Ɣuct 1977.

 

Last modified on Akras, 17 Ɣuct 2022 16:12
Ass Aɣelnaw n Tmedyezt: Ahil d anesbaɣur i yiriri n tejmilt i Moufdi Zakaria
  Yeffeɣ-d ass n : Aynas, 15 Ɣuct 2022 12:49     Taggayt : IDLES     Ɣran-t : 39 n tikkal   Bḍu