Menu principal

Menu principal

Mahboub Bati d anaẓur d-yeǧǧan acḥal n yitran mechuṛen n uceɛbi

Yeffeɣ-d ass n : Asamas, 14 Ɣuct 2022 13:10   Ɣran-t : 26 n tikkal
Mahboub Bati d anaẓur d-yeǧǧan acḥal n yitran mechuṛen n uceɛbi

ZZAYER TAMANEƔT – Mahboub Safar Bati d anaẓur ay yerran aṭas n yitran n uceɛbi mechuṛit yernu yeǧǧa-d aṭas n tezlatin yettwassnen deg yiseggasen n 1970. Wa d amẓawan uẓwir, ameskar n tezlatin yernu d imsisger ay d-yeǧǧan taṣekka s wazal-nnes deg uẓawan azzayri.

Anaẓur-a uẓwir d netta ay yessawḍen tuɣac mechuṛen am El Hachemi Guerouabi, Amar Ezzahi, Boudjemaa El Ankis d Abdelkader Chaou ad d-flalin deg unrar aẓuran n yiseggasen n 1970.

Aseggas-a, tafaska taɣelnawt n tezlit n uceɛbi tefren ad terr tajmilt n Mahboub Bati d udraw-nnes deg uceɛbi s udraw n mennaw seg yismawen imeqranen am Abderrahmane El Kobbi, Abdelkader Chercham, Abdelkader Chaou d Kamel Aziz.

Safar Bati Mohamed El Mahboub ilul deg 1919 deg Lemdeyya. Yudef ɣer uɣerbaz n Leqran, sakkin, kra n wayyuren deffir waya, yebda yettadef deg umaḍal n uẓawan yernu yebda ilemmed s tɣawla. Deg 1937, yudef ɣer tekrut n umezgun n Mahieddine Bachtarzi anda ay yella yekkat lɣiḍa n teylewt.

Deg tallit-nni, daɣ, yelmed Mahboub asaksufun n ujazz yernu yedrew d yiwet seg tegrawin timezwura n ujazz deg Zzayer, d tin ay d-yessersel memmi-s n ɛemmu-s, Mahboub Stambouli. Sakkin, yesseɣnew-d tagrawt-nnes i yiman-nnes deg Bab Lwad, d tagrawt n « Tmerqmin ».

Yelmed-d daɣ aṭas sɣur yismawen mechuṛen n uẓawan deg tallit-nnes, am El Hadj M'rizek, El Hadj M'Hamed El Anka akked Khelifa Belkacem, aytmaten Fekhardji, Mohamed d Abderrahmane, sakkin, yudef, deg 1940, ɣer tuṛkist tatrart n Ṛṛadyu n Zzayer, anda ay yella yettat taklaṛinatt.

Mahboub Bati yella yessewham s wamek yella yezmer ad iwet lɛud deg tuṛkist tansayant n Khelifa Belkacem, sakkin, dindin ad iɛeddi ɣer wallalen itranen deg tegrawt n Mustapha Skandrani.

Deffir ma tessuɣal-d Zzayer tanaya-nnes taɣelnawt, yebda yettaru tizlatin. Amezwaru umi yura d Abderrahmane Aziz.

Mahboub Bati yeqdec ɣef waṭas n yisenfaren inẓawanen armi d iseggasen n 1970 anda ay rfan fell-as kra seg yimagaẓen n uẓawan-a. D acu kan, netta yella yegguccel ad ikemmel asetrer n uceɛbi dɣa yura-d yernu yessasger-d azal n 100 n tezlatin ay d-tecna tsuta d tamaynut n yicennayen.
Tizlatin-nnes cnant-tent tuɣac d tihuskayin yernu d aya ay t-yeǧǧan ad iḥaz agdud ilemẓi n yiseggasen n 1970 s tezlatin mechuṛen am « Lbareḥ » (Iḍelli) ay d-yecna El Hachemi Guerouabi, « Ṛaḥ lɣali » (Yedda win ɣlayen) n Boudjemaa El Ankis, « Nesthel el kiya » n Amar El Achab, « Djah rabbi ya djirani » ay yerran bdelkader Chaou mechuṛ akked « Mali hadja » n Amar Ezzahi.

Deg tgara n yiseggasen n 1970, Mahmoud Bati yufa-d lḥal yura-d azal n 500 n tezlatin. Yewweḍ tamella n Yuc ass n 21 Fuṛaṛ 2000 yernu yeǧǧa-d taṣekka d tameqrant, kra seg-s ar ass-a ur tt-yessin ara ugdud.

 

Last modified on Aynas, 15 Ɣuct 2022 12:51
Mahboub Bati d anaẓur d-yeǧǧan acḥal n yitran mechuṛen n uceɛbi
  Yeffeɣ-d ass n : Asamas, 14 Ɣuct 2022 13:10     Taggayt : IDLES     Ɣran-t : 26 n tikkal   Bḍu