Menu principal

Menu principal

60 n yiseggasen seg uzarug : idles azzayri d tihawt i d-yufraren deg umaḍal

Yeffeɣ-d ass n : Asiḍyas, 23 Yulyu 2022 13:45   Ɣran-t : 3 n tikkal
60 n yiseggasen seg uzarug : idles azzayri d tihawt i d-yufraren deg umaḍal

ZZAYER  TAMANEƔT – Idles azzayri yedder, deg 60 n yiseggasen n uzarug, yiwen n ufeǧǧeǧ i d-yufraren deg umaḍal ama deg yemyigren akked temliliyin tigraɣlanin deg mennaw n teɣula gar-asen tagsarut, aẓawan, tasekla, yiẓuriyin n teklut, amezgun akked tgemmi.

Deg teɣult n tegsarut, tufrar-d Zzayer deg umaḍal s yisura inmettiyen, isura n umgaru akked wid n tmellaɣt, i stenyan yimseḍra imeqqranen gar-asen Ahmed Rachedi, Mohamed Zinet, Merzak Allouache akked kra n yilemẓiyen.

Kra n yisura wwin arrazen deg mennaw n tfaskiwin tigraɣlanin, ideg yella « Chronique des années de braise » n Mohamed Lakhdar-Hamina i yewwin Tadeddut n wureɣ deg Tfaska n Cannes deg useggas n 1975, « Z » n Costa-Gavras i yewwin Oscar n usaru amenyif awerdani deg useggas 1969 akked « La bataille d'Alger » n Gillo Pontecorvo i yewwin Izem n wureɣ deg Mostra de Venise deg useggas n 1966.

Deg teɣult n tsekla akked tegmi taggagant, aṭas n yimeskaren akked yinadmayen imeqranen i d-yufraren, ɣef umedya Mohamed Dib, Kateb Yacine, Mouloud Mammeri, Ahlam Mosteghanemi, Tahar Djaout, Tahar Ouettar, Mohammed Arkoun, Malek Bennabi akked Assia Djebar.

Aṭas n tmesriyin n udlis i yettwasuddsen, ideg tella Tmesrit tagraɣlant n udlis n Zzayer yellan d tadyant tadelsant taxatart ugar deg Zzayer yerna d yiwet seg gar tmesriyin timeqqranin deg umaḍal.

Deg teɣult n uẓawan, mennaw n tewsatin i d-ibanen. Ɣef uqerru-nsen Ṛṛay, yettwasetrer sakkin segraɣlanen-t deg yiseggasen 19990

Llant daɣen tewsatin-iḍen n uẓawan i d-yufraren ɣeḍment tibbuɣert n yidles azzayri, ɣef umedya Cceɛbi, Adiwan, Anedlusi, ccna acawi, aqbayli, abedwi akked utergi i d-yufraren imir-a deg usayes agraɣlan.

Drg tẓuriyin n teklut, turew-d Zzayer inaẓuren mucaɛen ɣef umedya Mohamed Racim, d yiwen seg yimezwura deg tẓuri n uqmamaḍ, Baya Mehieddine, d tamezwarut deg tẓuri n nniya, Bachir Yeles, Mohamed Khedda, Choukri Mesli, M'hamed Issiakhem, Abdelkader Guermaz akked Rachid Koraichi.

Deg tẓuri tis 4, ilul-d Umezgun aɣelnaw azzayri deg useggas n 1963 i wumi semman tura Mahieddine Bachtarzi, yiwen seg yimezwura deg tẓuri akked yidles Azzayri. Irgazen n umezgun isurfanen gar-asen Ould Abderrahmane Kaki yettwassnen s tṣekka-s « Lgerrab wa Ṣṣalḥin », Abdelkader Alloula d ameskar n umekraḍ mucaɛen « Amennay », Wid yelhan » akked « yigujilen », akked Muḥend U Yeḥya igan tagrawla deg umezgun s tenfalit tamaziɣt, akked mennaw n yismawen imeqqranen.

Aṭas n Tfaskiwin i yeqlen d tisuda, ideg tella tfaska taɣelnawt n umezgun n yiḥeffaḍen n Msetɣanem (1967), d yiwet n tfaska n umezgun n yiḥeffaḍen seg gar tid yellan d tiqburin deg umaḍal.

Deg uzawag n wunuɣen, mennaw n yismawen n yimseɣnawen i d-yufraren, gar-asen Mohamed Mazari (Maz), Menouar Merabtine (Slim) akked Said Zanoun yebdan ngum azarug. Tafaska tagraɣlant n uzawag n wunuɣen n Zzayer d yiwet seg gar tedyanin tixatarin n uzawag n wunuɣen deg Tefriqt akked umaḍal aɛrab.

Tessuddes Zzayer tidyanin timeqqranin iɣeḍmen tilin-is deg tɣerma akked tidgi-s yellan deg tqacuct, taxatart akk deg-sent d Tafaska tadelsant tafriqit i d-yeḍran kan deg tmurt n Zzayer snat n tikkal, deg useggas n 1969 akked 2009, s tihawt n yinaẓuren akked waggagen yemgarden n tmura tifriqiyin akked yimɣiwanen ifriqiyen yeddren deg umaḍal.

Llan daɣen tedyanin-iḍen am « Zzayer, Tamaneɣt n Yidles Aɛrab » deg useggas n 2007, « Qsenṭina, Tamaneɣt n Yidles Aɛrab » deg useggas n 2015, akked « Tlemsan, Tamaneɣt n Yidles Ineslem » deg useggas n 2011, ideg ttekkant mennaw n tmura n Tuddsa tislamant i usegmi, tussna akked yidles.

Ddeqs n yirmuden i yettwasuddsen i usmal n tsekta tamaziɣt n yidles azzayri, am Tfaska n umezgun amaziɣ n Tbatent, Tafaska n tezlit tamaziɣt n Tmenɣest, Anekcum n Tmaziɣt ɣer tmenḍawt d tutlayt tunṣibt deg useggas n 2016, s umsadeɣ akked unekcum ɣer tmenḍawt n uzref i yidles.

 

Tigemmi tanmaḍalt n talsa

Tesɛa Zzayer ṭam (8) n yiferdisen n tgemmi tarangan i yettwasiggzen deg tgemmi tanmaḍalt n talsa deg Unesco, Ahellil n Gurara deg useggas n 2008, aselsu n tissulya n Tlemsan « Ccedda n Tlemsan » deg useggas n 2012, Sbuɛ n Tlalit n Nnbi deg Timimun akked Imzad i yettwasiggzen d tigemmi tucrikt gar Zzayer, Mali akked Nnijer deg useggas n 2013.

Yella daɣen deg wumuɣ, aḥuǧu aseggasan ɣer tqerrabt n Sidi Ccix deg Lbeyyeḍ, akked tfugla n Sbiba n Ǧnet (aseggas n 2014), akked wansayen yeqqnen ɣer ufares akked wučči n seksu yettwasmunen d tigemmi tucrikt n yiɣerfan n tmazɣa (deg useggas n 2020, akked usuneɣ n yisekkilen n teɛrabt tettwasun d tigemmi tucrikt n umaḍal aɛrab akked yineslem (deg useggas n 2021).

Deg wayen yerzan tigemmi tangant, tessekcem Zzayer sa (7) n yiferdisen deg wumuɣ n Tgemmi tanmaḍalt n talsa n Unesco gara-asen « Tiɣremt n Bni Ḥemmad » deg Temsilt deg useggas n 1980, idgen isenzikanen iqburen n « Ǧamila » deg Sṭif, « Timgad » deg Tmatent akked « Tpaza », deg useggas n 1982.

Ttwasmunen daɣen d tigemmi tanmaḍalt, deg useggas-nni, asalay yeldin « Ṭasili n Ajjer » akked « Iɣzer n Mẓab » deg Tɣerdayt, teḍfer-itent-id « Teqsebt n Zzayer tamaneɣt » deg useggas n 1992.

Tesɛa daɣen Zzayer semmus n yifragen idelsanen iɣelnawen gar-asen « Ṭasili n Ajjer », « Aheggar », « Twat-Gurara-Tidikelt », « Aṭlas awniri » akked « Afrag adelsan n Tinduf », akked simraw yigzumen yettwamesten ilan azal ameqqran deg tgemmi.

La tettmùahal imir-a, d acrik akked Tdukli tafriqit akken ad sseḍrun yiwen n usenfar n Asalay Ameqqran n Tefriqt.

Ad yettwaɣnew yerna ad yers ddaw leɛnaya n Unesco, asammas i uḥareb ɣef tgemmi tadelsant tarangant deg Tefriqt, d yiwet n tallunt n umyiger n yimsenziken ifriqiyen yemmuzgen deg tgemmi tarangant n Tefriqt.

 

Zzayer, d yiwen seg gar ddwaḥ n talsa

Deg wamber 2018, imsenziken izzayriyen akked yimezɣaren ufan later n tihawt n umdan ilan azemz n wazal n 2,4 n yimelyunen n yiseggasen deg udeg yellan deg « Ɛin Bucriṭ » deg temnaḍt n Ɛin Leḥnec deg Sṭif « Agafa agemmuḍan n tmurt).

Yiwet n teɣlamt n yinagmayen izzayriyen, ispenyuliyen, ustraliyen akked yifransiyen caren-d tifin n yifecka ilitiyen s uẓru inejren akked yiɣsan n yiɣersiwen i d-yefkan ttbut dakken adeg-a d wis sin yellan d aqbur ugar deg umaḍal deffir win n Kuna deg tmurt n ityupya ilan deg leɛmer-is 2,6 n yimelyunen n yiseggasen yers d dduḥ n talsa.

Tifin-a tasenzikant taxatart ideg caren anadi deg yiseggasen n 90 i d-yettwasiẓergen deg tesɣunt tussnant tamarikanit mucaɛen « Tussna », tefka-d ttbut n turda n tilin n snat n tizratin n uqelleɛ n tɣerma n umdan, seg Tefriqt n Ugemmuḍ akked Tefriqt n Ugafa.

 

60 n yiseggasen seg uzarug : idles azzayri d tihawt i d-yufraren deg umaḍal
  Yeffeɣ-d ass n : Asiḍyas, 23 Yulyu 2022 13:45     Taggayt : IDLES     Ɣran-t : 3 n tikkal   Bḍu