Menu principal

Menu principal

Ajram n yiɣbula idelsanen n tmura tifriqiyin yella deg wul n tsertiyin tihersanin (amazzay asanigali)

Yeffeɣ-d ass n : Asinas, 19 Yulyu 2022 12:41   Ɣran-t : 0 n tikkal
Ajram n yiɣbula idelsanen n tmura tifriqiyin yella deg wul n tsertiyin tihersanin (amazzay asanigali)

ZZAYER  TAMANEƔT - Ajram n yiɣbula idelsanen n tmura tifriqiyin yettwahersen yella « deg wul n tsertiyin n yinagrawen ihersanen  n turuft », i d-yenna usdawan asanigali, Felwine Sarr, i la yettwalin deg waya « d asenfar iɣef swinegmen » akken ad ḍemnen adummu ahersan deg umenẓaw, ula deg Zzayer i yesfuglen aseggas-a amulli wis sḍimraw n uzarug-is.

Deg yiwet n tdiwennit i yefka i Tnegga n Yisalan n Lezzayer ɣer tama n yiwen n umyiger-askasi i iga melmikan deg Zzayer tamaneɣt, yenn-d Felwine Sarr dakken teḍniwin tihersanin turufiyin, ideg tella teẓrahrest tafransit, mmahlen akken « ad hudden izudar idelsanen n tmura tifriqiyin i ṭṭfen akken ur zemmrent ara ad alsent lebni i yiman-nsent ».

Yuɣal-d Felwine Sarr s aneqqis i iga, deg useggas n 2018, akked usdawan anmezray afransi Bénédicte Savoy, ɣef tririt n tgemmi tadelsant tafriqit yettwakren deg twala tafersant seg tmura ṭṭfen, i d-yezzakknen amḍan n waylaten idelsanen yellan deg yisalayen urufiyen deg Fransa, deg Lalman, deg Tutrict, deg Biljik, deg Ṭṭalyan, deg Spenyul, deg Tmura n Wadda neɣ deg Vatican.

Yesseddi-d dakken aneqqis-a yessaweḍ ad yerr aylaten idelsanen i tmura ɣef umedya n Côte d'Ivoire, Ssanigal akked Binin, yebder-d tamzelt taneggarut n tririt ideg llant 26 n tsiwayin seg Fransa ɣer Benin deg teggara n useggas n 2021, yerna yezzireg-d dakken « amḍan n tṣekkiwin akked waylaten ur yesɛi ara azal sdat n uzal-nsen anelɣi akked uzamulan ».

Yebder-d daɣen usdawan, mi la d-yettmeslay ɣef uneqqis-a, yiwet n tikli i yessawḍen aṭas n tmura am Mali, Burkina Faso, Ččad, neɣ Tagduda tamagdayt n Kungu, ad ssutren tiririt n tgemmi-nsen yettwakren, yesseddi-d dakken  azun-a n tikliwin yella « yella seg yiseggasen n 1960 war ma tella-d tririt seg ɣur teḍniwin tihersanin ».

Yenna-d uneqqis-a dakken 90% n tṣekkiwin n tẓuri tifriqiyin llant beṛṛa n umenẓaw (Deg Turuft).

Yenna-d dakken 90.000 n tṣekkiwin tuker-itent Fransa deg twala tahersant mazal-iten ffrent deg yisalayen am win n Quai Branly-Jaques Chirac ideg yella, netta kan, 70.000 n tsiwayin n tmura akk n tefriqt tadunirant.

Mi d-yerra ɣef yiwet n tuttra yerzan aylaten idelsanen izzayriyen, yesseddi-d Felwine Sarr dakken aneqqis-a, i nga seg i t-id-yessuter Uselway afransi Emanuel Macron, ur d-yemmeslay ara ɣef tuttriwin yeqqnen ɣer tṣekkiwin i d-yekkan seg Tefriqt n ugafa, ɣas akken llant deg telkensiyin tinagdudin tifransiyin.

Aylaten-a ḥwaǧen, ɣef wakken i yettwali, ad ilint « tsuḍfiwin yemgarden ɣef tid n Tefriqt tadunirant » yerna yessefk ad tili fell-asen yiwet n « tuɣdaḍt akked yiwen n uswingem tulmist ». Aneɣlaf n Yimǧuhad akked wid ilan izerfan, Laïd Rebiga, yenna-d, deg yennayer-a aneggaru, dakken Zzayer teɣtes akken « ad terr akk tigemmi-s tamazrayt akked tdelsant seg uzɣar », rnu-d daɣen ula seg Fransa, am wakken i d-yers deg yimirwen yellan deg wahil n Uselway n Tegduda, Abdelmadjid Tebboune.

Tebda tikli-ya, i d-yesmekti uneɣlaf, s tririt n yiqecrar n yinazbayen izzayriyen mi d-tella tenbaẓt akked thersa tafransit.

Yerna yezzireg-d uneɣlaf dakken tiririt n tgemmi tamazrayt akked tdelsant d « tuzwirt n Uwanak azzayri deg wayen yerzan akaram n Tkatut ».

Seg yidis-is, yewɛed Uselway afransi, deg useggas n 2017, akken ad yerr aylaten idelsanen n tmura Tifriqiyin n tdunirant, yerna iwekkel imaslaḍen n unabaḍ-is akken ad ḍefren tikli-ya, ma d ayen i d-yettwaseḍran, nezmer ad t-nessiḍen s yiḍudan n yiwen n ufus.

Seg yidis n Yiɣlanen Yeddukklen, Unesco (Tuddsa n yiɣlanen yeddukklen i usegmi, tussna akked yidles, tenna-d ad tbedd ɣer yidis n tmura tifriqiyin deg umennuɣ-nsent n tririt n tgemmi-nsent i ukrent teḍniwin tihersanin.

Ilul deg useggas n 1972 deg Ssanigal, yelmed Felwine Sarr tadamsa deg Fransa sakkin yesselmed deg tesdawit n tmurt-is. Deg useggas n 2020 iṛuḥ s Iwanaken Yeddukklen akken ad yessissen tamentilt akked umennuɣ n umenẓaw akken daɣen ad yawi tarmit takadimant tanglizt-tasaksunt. La yesselmad imir-a deg Caroline n ugafa.

 

Last modified on Akwas, 21 Yulyu 2022 10:45
Ajram n yiɣbula idelsanen n tmura tifriqiyin yella deg wul n tsertiyin tihersanin (amazzay asanigali)
  Yeffeɣ-d ass n : Asinas, 19 Yulyu 2022 12:41     Taggayt : IDLES     Ɣran-t : 0 n tikkal   Bḍu