Menu principal

Menu principal

Tuttuyt taɛṛabt n « Tkussna Tazzayrit » teffeɣ-d ɣer teẓrigin n Kalma

Yeffeɣ-d ass n : Akras, 10 Fuṛaṛ 2021 12:45   Ɣran-t : 1 n tikkal
Tuttuyt taɛṛabt n « Tkussna Tazzayrit » teffeɣ-d ɣer teẓrigin n Kalma

LEZZAYER TAMANEƔT – Teffeɣ-d tuttuyt taɛṛabt n « Tkussna Tazzayrit » ɣef umezruy, tasertit, idles, tasekla, tiẓuriwin, igaluzen d yimedruzen imezruyanen ɣer teẓrigin n Kalma.

Tuttuyt-a teffeɣ-d deg kuẓ n yisunḍen yernu rnan-as kra n yiɣfawen deg umezruy n Lezzayer tagelsant.

Isdawanen, imnadiyen d yineɣmasen ay yettekkan deg udlis-a ssalqyen tizrawin-nsen yernu gan-d inadiyen ɣef yidles d tgemmi tazzayrit seg talliyin yemgerraden, am wakken ay d-uran ɣef tẓuriwin d tsekla.

Aḥric amezwaru n tkussna-a yebder-d talliyin yemgerraden n umezruy n Lezzayer seg tallit taqburt ar ass-a yernu d Benyoub Rachid ay isaggen ɣef tirawt-nnes s taɛṛabt.

Asuneḍ wis sin n tkussna-a d win yerzan tigemmi tanesbaɣurt ay tesɛa Lezzayer, gar-asen isemlen d yimedruzen isenzikanen d yimezruyanen am temda tasenzikant ay d-ufan seg melmi kan deg Ɛin Leḥnec (Sḍif).

Asuneḍ-a yessawel-d daɣ ɣef temdinin tigelsanin am Siga, Tagast, Tibest d Tahert, ideggen n uɛbad (timesgidiwin d teklizin), Taqliɛt n Ayt Ḥemmad d Yiɣzer n Mẓab d yiɣaniben isegdanen yemgerraden (anumidi, abizenṭi, islaman d unedlusi).

Asuneḍ wis kraḍ yella-d ɣef tẓuriwin n tsekla. Deg-s, yefka-d umaru-aneɣmas Hamid Abdelkader taɣuri taselḍant ɣef ufares aggaga, ussnan d useklan azzayri yernu yerra tajmilt i wudmawen izamulanen n yiger aggagan azzayri am Mustapha Lacheraf, Mohamed Arkoun, Agerram Agustan, Abdelhamid Benhadouga, Amin Zaoui d Rachid Boudjedra.

Ma d asuneḍ wis kuẓ yesɛan azwel n « Amezruy d Tkatut » d win ay d-gan ɣef Lezzayer tagelsant, yernu d win aydeg apṛufisur Mohamed Elhadi Harech, yellan d amazzag deg umezruy n Numidya d tmura n Lmeɣreb deg tallit taqburt, yura-d ɣef umezruy aqbur n Lezzayer yernu yebder-d tameddurt tanmettit, taggagant, tamezruyant d tensayant deg tallit-nni, am wakken ay d-yedda deg-s, daɣ, yiɣef ɣef Tgelda n Numidya. Dima deg usuneḍ-nni, yura-d umnadi Abdelhakim Belbeti ɣef « Lezzayer seg tallit n yislaken inselmen arma d Ifaṭimiyen d uɛeddi n udabu seg Waɛṛaben ɣer Yimaziɣen », am wakken ay d-yura ɣef Lezzayer deg tallit taɛetmanit, asehres afṛansi d uzbu aɣerfan.

Ddant-d deg-s daɣ tseknudrin n wudmawen imezruyanen d yiɣelnawen am Mohamed Boudiaf, Abbane Ramdane, Mustapha Ben Boulaid d Hassiba Ben Bouali.

 

 

Last modified on Akras, 10 Fuṛaṛ 2021 12:46
Tuttuyt taɛṛabt n « Tkussna Tazzayrit » teffeɣ-d ɣer teẓrigin n Kalma
  Yeffeɣ-d ass n : Akras, 10 Fuṛaṛ 2021 12:45     Taggayt : IDLES     Ɣran-t : 1 n tikkal   Bḍu