Menu principal

Menu principal

D Kessai Athmani n Bgayet ay d-irebḥen amsazwar amnaḍan n tezlit n uceɛbi

Yeffeɣ-d ass n : Akwas, 09 Yennayer 2020 16:15   Ɣran-t : 2 n tikkal
D Kessai Athmani n Bgayet ay d-irebḥen amsazwar amnaḍan n tezlit n uceɛbi

BGAYET – D anaẓur ilemẓi Kessai Athmani n yiɣrem n Tala n Ḥemza (Bgayet) ay d-irebḥen amsazwar amnaḍan n tezlit n uceɛbi ay ifuken ass n ukras (laṛebɛa) tameddit deffir 4 n wussan n tyaka aydeg ttekkan azal n 30 n yinmezgayen seg 6 n twilayin n tlemmast tagmuḍant.

Amsazwar-a ayɣef d-nnan kra yesɛa aswir ifazen d win aydeg rebḥen daɣ sin n yilemẓiyen niḍen, yernu wi d Malek Saidani ay d-yusan d wis sin, akked Riad Akchout yellan, ula d nitni, seg twilayt n Bgayet. Afran yella-d d aweɛṛan s waṭas yernu wid ay d-yeflalin, ula ma ẓewren aṭas, sɛan qrib yiwen n uswir.

Wid ay iḥedṛen yeɛjeb-iten daɣ umlazmar n tlemẓit Nacira Benali n Yifeṛḥunen (Tizi Uzzu) ay yecnan s uɣanib d ucbiḥ tizlit n « A yemma ur ttru » n umedyaz n tegrawla Farid Ali.

Ma d inaẓuren niḍen, ula ma rbiḥen ara, am yilemẓi n Lotfi Lakehal ay d-yusan seg Ǧiǧel, ɛejben daɣ wid iḥedṛen s tuɣac-nsen tihuskayin.

« Amur ameqran seg-sen wejden akken ad qqlen d imsaduren. Yagi wwḍen ɣer uswir amsadur s yimlazmaren-nsen », ɣef wakken ay d-yenna Djamel Mahindad yellan seg yimsuddsen n tedyant-a, am wakken ay yummar s umsazwar-a amnaḍan ay d-yenna dakken yezmer ad yeqqel d aɣelnaw.

Tasehṛa n uxtam iga-tt yiwen seg yigensasen imeqranen akk n tezlit n uceɛbi n wass-a, Redha Charef, yernu iwet-d deg-s tizlatin seg tgemmi n Lezzayer Tamaneɣt.

 

Last modified on Asamas, 12 Yennayer 2020 14:39
D Kessai Athmani n Bgayet ay d-irebḥen amsazwar amnaḍan n tezlit n uceɛbi
  Yeffeɣ-d ass n : Akwas, 09 Yennayer 2020 16:15     Taggayt : IDLES     Ɣran-t : 2 n tikkal   Bḍu