Menu principal

Menu principal

Asmanay n Ṣṣumam (Bgayet) d tadyant tagellusant deg ubrid ɣer trennawt n Zzayer

Yeffeɣ-d ass n : Akras, 17 Ɣuct 2022 19:59   Ɣran-t : 157 n tikkal
Asmanay n Ṣṣumam (Bgayet) d tadyant tagellusant deg ubrid ɣer trennawt n Zzayer

BGAYET – Sḍimraw sḍis (66) n yiseggasen aya, deg wass n 20 Ɣuct 1956, ay d-yella Usmanay n Ṣṣumam deg Yifri Uzellagen (Bgayet), yernu d win ay d asmanay amezwaru n Terni n Uslelli Aɣelnaw. Asmanay-a d netta ay yessersen tirsal n usuddes asertan d uredsan amaynu n tegrawla, yernu yenjeṛ abrid i trennawt d tmeṣkiwt n tgejda n tsuda n Zzayer tamaynut.

Tadyant-a tella-d deg tuffra tummidt deg temnaḍt aydeg taredsa tahersant ur telli ara tebɛed. Ta d timlilit aydeg derwen yimḍebbren igejdanen n Tegrawla.

Gar wid iderwen, yella Larbi Ben M’hidi, aɣella n wasun wis V (semmus) yernu d netta ay d yesselwin amyager-a. Yella daɣ Abane Ramdane, asemyaddas n Temdint n Zzayer yernu d netta ay d awnetlay n usmanay. Zighoud Youcef yella d agensas n wasin wis II (sin). Krim Belkacem d agensas n wasun wis III (kraḍ). Amar Ouamrane d agensas n wasun wis IV (kuẓ). Ma d Lakhdar Bentobbal seg wasun wis II yernu d yiwen seg wid yesɣiwsen, ɣer yidis n Zighoud Youcef, i wagir n Ugafa n Qsenṭina deg Ɣuct n 1955.

Llan yimḍebbren niḍen, gar-asen Slimane Dehile, Amenzaḍ Azzedine, Si Lakhdar d Ali Khodja. Sin seg yismawen imeqranen ay iban. Mostefa Ben Boulaid, ay yemmuten deg yimenɣi semmus n wayyuren uqbel, akked Ahmed Benbella, yellan d agensas n tmagla n uzɣar imi ur yessaweḍ ara ad d-yadef ɣer tmurt. Daɣ, Ali Mellah ur yessaweḍ ara ad yedrew deg usmanay, maca yuzen-d agensas seg wasun wis IV (kuẓ).

Mraw sḍisest (16) n tmagliwin ay ihan yernu muhlent akken ad fkent « tadinamit d tamaynut i Tegrawla », am wakken ay zemlent « tadukli d tuqdist » i lmend n ubdad ɣer yidis n Terni n Uslelli Aɣelnaw, asdukkel n yiɣallen yellan deg udrar d yimaslaḍen yellan deg tmagla tuffiɣt, ɣef wakken ay d-yenna umeṛḥum Djoudi Attoumi, yellan d afesyan aqbur n Tredsa n Uslelli Aɣelnaw yernu d win yuran amezruy n Tegrawla. Yerna-d dakken asmuteg i Usmanay n Ṣṣumam yebda-d seg tezwara n 1956, sḍis n wayyuren uqbel ma yella-d.

Abane Ramdane, Ben M’hidi d Amar Ouzeguene gan amahil igerrzen deg usmanay-nni, ɣef wakken ay d-yenna Attoumi deg yiwet n tdiwennit d Tnegga n Yisalan n Zzayer kra n yimalasen uqbel ma yemmut deg Ctembeṛ n, 2021 deffir yimmeẓḍa seg waṭṭan n Covid-19.

Deg tidet, urmen ad ssuddsen asmanay-a deg temnaḍt n Qsenṭina, sakkin, ssahlen-t ad d-yili deg Teqliɛt n Ayt Ɛebbas ur yeggugen ara ɣef Yiɣil Ɛli. Tagara, semmten-d ɣef lǧal n yiwet n tedyant d tamaglayt.

Kra seg yimjahden ay yellan tteddun ad derwen, Krim Belkacem d Mohamedi Said, llant tteddun ad kken ɣef ubrid n Wallaɣen, ur yeggugen ara ɣef Uqbu, maca faqen-asen yiɣallen n ucengu yernu qersen fell-asen.

Akken kan ay yebda uqras, aserdun ay d-wwin yimjahden yernu ɛebban-as azal n 30.000 n yifṛanken, yerwel ɣer unsa aredsan n ucengu, ɣef wakken ay d-yeḥka Djoudi Attoumi. S waya, terra tmara ad yettwassenfel akk udeg aydeg ara d-yili usmanay-nni, yernu, deg tgara, fernen-d Ifri Uzellagen.

Akken ad yerbeḥ usmanay-a, ddmen yimḍebbren ay terza temsalt akk akaten yessefken. Deg usmanay, timagliwin fkant-d imla ɣef tegnit-nsent, ladɣa deg wayen yerzan idrimen, imrigen d yimḍanen n yimjahden yemmutgen (imjahden yettnaɣen, imsebblen d yimeɣnasen). Ssawlent-d tmagliwin, daɣ, ɣef tegnit tasnafsant n yimjahden d tɣerfa deg yal tawilayt, ɣef wakken ay d-yenna unemhal n Usalay n Umjahed n Bgayet, Redouane Hani, ay yefkan ifatusen ɣef waya i Tnegga n Yisalan n Zzayer.

« Imesmanayen gan-d tacrawt d timdeqqeqt ɣef sin n yiseggasen n umgaru (1954-1956) yernu ddmen tineɣtusin d tigellusanin ama deg wayen yerzan tukksa n lexṣaṣ yellan, ama deg wayen yerzan allus n umsal n usuddes asertan d uredsan n Tegrawla. S waya, ters Tegrawla deg ubrid n trennawt », ɣef wakken ay d-yenna.

« Ulac akk kra n tɣult ur yettwaselḍen ara niɣ tin umi d-bdiren ara iɣeblan », ɣef wakken ay d-yenna, am wakken ay d-yerna dakken din ay d-sɣenwen tiwilayin timezruyanin yernu yella-d ubeṭṭu adeblan d uredsan d amaynu. Deg usmanay-a daɣ, ay d-sɣenwen tinefra, taɣemsa d yimidyaten yerzan ama aserdas n Tredsa n Uslelli Aɣelnaw, ama aɣerman.

« Ula d igujilen d teɣtas n umgaru ttwabedren-d deg yiskasiyen i lmend n tallalt-nsen », ɣef wakken ay d-iwekked.

Asmanay ifuk s usmemmi n umḍan meqqren n tneɣtusin, yernu sɣenwen-d, deg ukatar n usmanay, yiwen n useqqamu aɣelnaw n Tegrawla Tazzayrit d tseqqimt n usemyuddes d uselkem ay inejṛen abrid i useɣnew n uwanak azzayri atrar.

Asmanay-a yella-d amures ummid yernu wid ay iderwen deg usmanay-a ummaren. Asmanay ifuk s umsudeɣ amatu n yiɣallen n Tredsa n Uslelli Aɣelnaw deg yiɣrem n Temriwin, d win aydeg Abane Ramdane d Zighoud Youcef ɛeddan-d ɣef yiysan yernu banen ummaren.

Last modified on Asiḍyas, 20 Ɣuct 2022 15:53
Asmanay n Ṣṣumam (Bgayet) d tadyant tagellusant deg ubrid ɣer trennawt n Zzayer
  Yeffeɣ-d ass n : Akras, 17 Ɣuct 2022 19:59     Taggayt : LEZZAYER     Ɣran-t : 157 n tikkal   Bḍu