Print this page

Imrigen n tredsa ttwawehhan kan i umzaɣ n tnaya taɣelnawt

Yeffeɣ-d ass n : Akwas, 07 Yulyu 2022 11:50   Ɣran-t : 0 n tikkal
  • Bḍu
Imrigen n tredsa ttwawehhan kan i umzaɣ n tnaya taɣelnawt

ZZAYER TAMANEƔT – Iwekked-d uɣella n umaddad n Tredsa Taɣelnawt Taɣerfant, Said Chanegriha, dakken imrigen n tredsa ttwawehhan ala i umzaɣ n Zzayer d tnaya-nnes taɣelnawt d usdusu n talwit d urkad deg umaḍal ddaw leɛnaya n Yiɣlanen Yeddukklen. Yenna-d Mass Chanegriha awal-nnes i lmend n tfugla n userhu n yikataren d yimahalen n Tredsa Taɣelnawt Taɣerfant ay iderwen deg umsudeɣ aredsan ay d-yellan i lmend n usfugel n umulli wis 60 n uzarug, ɣef wakken ay d-yenna yiwen n ulɣu n uɣlif n umzaɣ aɣelnaw.

« Nmuhel akken ad nesɛeddi izen d axatar deg usfugel-nni yernu wa d win aydeg ara d-nessken dakken imrigen n Tredsa Taɣelnawt Tɣerfant ttwawehhan kan i umzaɣ n Zzayer, aḥraz n tlisa-nnes d tnaya-nnes taɣelnawt, akked udraw deg usdusu n talwit d urkad deg umaḍal ddaw leɛnaya n Yiɣlanen Yeddukklen. I lmend n waya, Zzayer tessenfalay-d timeɣsiwt d uguccel-nnes akken ad turar tamlilt d tagellusant deg unrar amnaḍan d ugraɣlan deg ukatar n usaḍuf agraɣlan », ɣef wakken ay d-iwekked ijiniṛal n tredsa Said Chanegriha deg tfugla-a ay d-yellan deg Uɣerbaz Aɣelnaw n Yimsatwilen n Usilel Agennan n Leblida, deg Temnaḍt Taredsant Tamezwarut.

« Nesseḥbaber s udeqqeq akken amsudeɣ-a ameqqran ad yili deg uswir n tsekta n usfugel-a, d win ara yerren tajmilt i tɣersawin d umirew amekdi n wid ay iḥerzen tukkest-a. Aya daɣ d azamul i usdusu n terni tagensit d wassaɣ n uɣref d tredsa-nnes ladɣa imi imahalen n tredsa d arraw n uɣref-a abɣas », ɣef wakken ay d-yerna.

Deg tezwara n tfugla-a tazamulant, yeɣra-d ujiniṛal n tredsa tinawt aydeg ay yesnemmer seg wul, s yisem-nnes netta d yisem n uselway n tegduda, wid ay iderwen deg umsudeɣ-nni aredsan.

« S teḍfi tameqqrant ara farṣeɣ tagnit-a ay d-yellan deffir umures igerrzen n umsudeɣ-nni aredsan ay d-yellan ass n ukras, i usfugel n umulli wis 60 n tmerɣa n uzarug d usuɣal n tnaya taɣelnawt, akken ad awen-d-ssenfaliɣ, s yisem n uselway n tegduda, Abdelmadjid Tebboune, aɣella anafella n yiɣallen umrigen, aneɣlaf n umzaɣ aɣelnaw d yisem n wakk imahalen n Tredsa Taɣelnawt Taɣerfant, ahenni meqqren akk d tejmilt lqayen akk ɣef wussisen imeqqranen ay tgam deg wakk takkayin n usmuteg d uselkem n umsudeɣ-a ara yeqqimen i lebda yenqec deg tkatut n uɣlan », ɣef wakken ay d-iwekked.

 

Last modified on Asiḍyas, 09 Yulyu 2022 12:02
Imrigen n tredsa ttwawehhan kan i umzaɣ n tnaya taɣelnawt
  Yeffeɣ-d ass n : Akwas, 07 Yulyu 2022 11:50     Taggayt : LEZZAYER     Ɣran-t : 0 n tikkal   Bḍu