Deg yiwet n tesguri i tɣemsa deg yijifeṛ n uswaḍ ay yesweḍ amsazwar n usemres uffiɣ i wid ara yadfen ɣer tfekka n wuqqinen d yiwnetlayen n yiweẓla iwerdaniyen, deg wammas n usekyed n Zzayer deg Tesdawit n Tussniwin d Tesnatwilin n Houari-Boumediene, yenna-d Mass Lamamra dakken « tamsalt-a (n ugzam n wassaɣen idiplumatiyen gar Zzayer d Rrbaṭ) ur tqebbel ara akk kra n tebdammast ».
Mi yettwatter ɣef ma yella Tagelda Tasaɛudit ad tili d tanebdammast gar Zzayer d Meṛṛuk, iwekked-d uɣella n tdiplumatit tazzayrit dakken « ur telli ara akk kra n tebdammast… yernu werǧin ad tili ama ass-a, ama azekka », am wakken ay d-iwekked ɣef « tyettiwin tidusanin ay d-yellan d tamentilt n uxṣar n wassaɣen » yernu d idis ameṛṛuki ay d amasay ummid deg waya.
Zzayer d Tgelda Tasaɛudit sɛant tinufa d tucrikin yernu myadasent tmuɣliwin-nsent akken ay myadasent tmuɣliwin n Zzayer d waṭas n tmura niḍen, « ama d taɛṛabin, ama d tifriqiyin niɣ d tiyaḍ », ɣef wakken ay d-ineyyer Mass Lamamra ay d-yesmektin s tesguriwin n uselway n tegduda, Mass Abdelmadjid Tebboune deg wayen yerzan aya.