Menu principal

Menu principal

Zzayer-Ṭṭerk: Azmal n tesguri tucrikt n Useqqamu 1u n Unmireg n Uswir Unnig

Yeffeɣ-d ass n : Asinas, 17 Mayu 2022 11:11   Ɣran-t : 2 n tikkal
Zzayer-Ṭṭerk: Azmal n tesguri tucrikt n Useqqamu 1u n Unmireg n Uswir Unnig

ANKARA – Iwekked-d uselway n tegduda, Mass Abdelmadjid Tebboune, ass n uynas deg Ankara, dakken amḍan n yimtawayen ay yettwazemlen gar Zzayer d Ṭṭerk d ayen ay d-yeskanayen dakken yellan usemyuddes, amsenfal d umyessmad adamsan d udelsan gar akk igzumen.

Deg yiwen n usarag ucrik n tɣemsa d umtil-nnes aṭerki, Recep Tayyip Erdogan, ay d-yellan deg Usuddis Aselwayan n Ankara deg ukatar n terzi-nnes n uwanak ɣef Ṭṭerk, yenna-d uselway Tebboune dakken « ableɣ n yimtawayen yettwazemlen, ass n uynas, d ayen ay d-yesskanayen asemyuddes, amsenfal d umyessmad adamsan d udelsan gar snat-a n tmura deg wakk igzumen », am wakken ay yessarem dakken igmaḍ n waya akk ad yili yelha deg uktazel ara d-yilin aseggas ay d-itteddun deg temlilit n Useqqamu n Unmireg Ucrik n Uswir Unnig.

I lmend n waya, yesmekti-d uselway Tebboune anmireg ucrik deg ugzum n yimeẓḍiyen deg Ɣilizan d ugzum n wuzzal deg Wehṛan, am wakken ay d-yesmekti daɣ s teṛmist n Tosyali ay yessaǧwen azal n umelyaṛ n yidulaṛen n yifarisen.  

Mi yettwatter ɣef usihrew n ublag adamsan azzayri-aṭerki akken ad d-iḥaz tiɣula yellan d tisnuddsanin ugar, iwekked-d uselway Tebboune dakken « imtawayen ay yettwazemlen ur sɛin tilisa la deg tnecta, wala deg wakud ».

« Netteddu ɣer yimtawayen isnuddsanen yernu nenwa daɣ, deg ukatar n usnegmu n temguri d yimsenfalen imguranen gar snat-a n tmura, ad neddu s tɣawla ɣer temguri tanawant, taɣarimt d tredsant akked temguriwin n tnafa tucrikt d wayen ara iḍemnen tanaya n snat-a n tmura-a », ɣef wakken ay d-iwekked uselway n tegduda.

Seg yidis-nnes, yenna-d uselway Erdogan dakken tirzi n uselway Tebboune ɣef Ṭṭerk d tin ay d-yesskanayen tadinamit tamaynut n wassaɣen isindisanen gar snat-a n tmura.

Aselway aṭerki ifureṣ tagnit akken ad ihenni aselway Tebboune ɣef usfugel n umulli wis 60 n uzarug n Zzayer d umulli wis 60 n uzeddi n wassaɣen idiplumatiyen gar snat-a n tmura.

 

Zzayer-Ṭṭerk: Azmal n tesguri tucrikt n Useqqamu 1u n Unmireg n Uswir Unnig
  Yeffeɣ-d ass n : Asinas, 17 Mayu 2022 11:11     Taggayt : LEZZAYER     Ɣran-t : 2 n tikkal   Bḍu