Deg tinawt-nnes deg tɣimit tačuṛant ay d-yellan i usemned n usenfar n usaḍuf ara isemden asaḍuf 01-11 yerzan asislem d teksamant, yenna-d Mass Boughali dakken « yessefk ad derwen akk yidisan ak terza temsalt deg teɣri n uselway n tegduda yernu aya d aɣan aɣelnaw, ladɣa imi tamurt tesmutug iman-nnes akken ad tesfugel amulli wis 60 n usuɣal n tlelli d tnaya-nneɣ », am wakken ay d-yerna dakken « Zzayer d ayla n wakk arraw-nnes yernu yessefk, ass-a, ad derwen deg ukala n wallus n tmeṣkiwt-nnes akked usegrew n wakk arraw n tmurt deg tiddit-a taɣelnawt tahaggaṛt, akken ay yeddukkel uɣref zik i uslelli n tmurt ».

Yenna-d uselway n texxamt taneddit n umni dakken « Zzayer yesselwi-tt, ass-a, uselway Abdelmadjid Tebboune ay d-yebdan takkayt d tamaynut deg umezruy n tmurt, d tin n usudus n temyamaẓt taɣelnawt d terni tagensit, yernu d tin aydeg yessefk ad d-yili usgiri n tmeṣkiwt n tsuda-nnes timenḍawanin s yisaḍufen ifrawanen, timeɣsiwt n uɣref d ufran ilelli. S waya, aselway Tebboune ad yili yeṭṭef deg wawal-nnes ay yefka i uɣref azzayri ».

Yerna-d daɣ dakken « ass-a, nebda-d takkayt aydeg ara neddu deg ubrid n wazalen-nneɣ inɣermayen, wid ay d-yettwagmen seg tumast n Tegrawla Tamangant s timmad-nnes akked Tesguri n Umenzu n Wamber ».