Menu principal

Menu principal

Yemlal uselway Tebboune d yigensasen n umɣiwan aɣelnaw yeddren deg Ṭṭerk

Yeffeɣ-d ass n : Aynas, 16 Mayu 2022 09:43   Ɣran-t : 2 n tikkal
Yemlal uselway Tebboune d yigensasen n umɣiwan aɣelnaw yeddren deg Ṭṭerk

ANKARA – Yemlal uselway n tegduda, Mass Abdelmadjid Tebboune, ass n usamas tameddit deg Ankara (Ṭṭerk) d yigensasen n umɣiwan aɣelnaw yeddren deg Ṭṭerk, yernu yella-d waya deg yijifeṛ n terzi n uwanak ay iga ɣef tmurt-a s uneɛruḍ n umtil-nnes aṭerki, Mass Recep Tayyib Erdogan.

Deg umyager-a, yessefled uselway Tebboune i yiɣeblan d yisumren n yigensasen n umɣiwan azzayri deg Ṭṭerk yernu yerra-d ɣef tuttriwin-nsen deg wayen yerzan tagnit deg Zzayer d waddad n wassaɣen izzayriyen-iṭerkiyen.

Aselway n tegduda iwekked-d ɣef tixxutert n wassaɣen gar snat-a n tmura, am wakken ay d-iwekked dakken assaɣen gar Zzayer d Ṭṭerk « d idusanen mliḥ deg wakk iswiren, ladɣa deg unrar adamsan, asertan d umezruyan ».

Iwekked-d daɣ uselway Tebboune dakken tirzi-nnes ɣef Ṭṭerk « tessefk » ladɣa ɣef lǧal n wassaɣen isindisanen yennegman gar Zzayer d tmurt-a deg yiseggasen-a ineggura, am wakken ay d-yerna dakken Zzayer temmuteg « ad tesnegmu assaɣen d Tegduda n Ṭṭerk yellan d tamurt taweltmat, yernu ad tessiweḍ assaɣen-a ɣer uswir unnig ugar ».

Aɣella n uwanak yesmekti-d, i lmend n waya, dakken Ṭṭerk d nettat ay d tamurt tamezwarut yessefrayen deg Zzayer s 4 n yimelyaṛen n yidulaṛen imarikaniyen am wakken ay tla ableɣ n yimsenfalen inezzanen ittezzin gar 4 d 5 n yimelyaṛen n yidulaṛen i useggas.

 

Last modified on Aynas, 16 Mayu 2022 11:11
Yemlal uselway Tebboune d yigensasen n umɣiwan aɣelnaw yeddren deg Ṭṭerk
  Yeffeɣ-d ass n : Aynas, 16 Mayu 2022 09:43     Taggayt : LEZZAYER     Ɣran-t : 2 n tikkal   Bḍu