« Tesɛam ɣer-wen tanga tamezruyant d yinẓaten… S waya, yessfefk ad teswingmem ɣef wamek ara tessiwḍem tukkest-a tamezruyant i ugdud, maci ala i waggagen d yinmezruyen kan », ɣef wakken ay d-yenna Mass Chikhi i yimazzayen deg teṛcibin deg usarag ay d-yellan i lmend wass aɣelnaw n tkatut d usfugel n umulli wis 77 n tdalusin n 8 Mayu 1945.

Yenna-d daɣ dakken « amekti n tkatut taɣelnawt d ayen ara ireẓmen abrid i usiweḍ n tukkest-a taxatart aydeg yexleḍ uneɣni d tumert i tsutwin ay d-yettenkaren », am wakken ay d-yesmekti s yidlisen yellan deg temkarḍit n teṛcibin tiɣelnawin aydeg llan 20 n wammuden n yimla ay d-gan yijiniṛalen ifṛansiyen gar 1830 d 1954.

Asemtar n uselway iger-d tiɣri, i lmend n waya, « i teɣḍeft d leḥder deg usekker n yal taftart i lmend n usiweḍ ɣer tidet » yernu iwekked-d dakken yessefk ad d-ttwasseknen akk wudmawen n tkatut asurif, asurif.

Mass Chikhi yesmekti-d daɣ dakken aselway n tegduda, Mass Abdelmadjid Tebboune, yettafk azal i ukaram n umezruy d tkatut yernu d aya ay d-yesskanayen tamasit n uwanak deg wayen yerzan tukkest-nnes tamezruyant yellan d isger seg tmagit taɣelnawt.