Menu principal

Menu principal

Tiddukliwin: Iger-d tiɣri Boughali i usaḍuf ara yeddun d tmenḍawt d tmuɣli n uselway Tebboune

Yeffeɣ-d ass n : Asimwas, 22 Yebrir 2022 15:04   Ɣran-t : 2 n tikkal
Tiddukliwin: Iger-d tiɣri Boughali i usaḍuf ara yeddun d tmenḍawt d tmuɣli n uselway Tebboune

ZZAYER TAMANEƔT – Iger-d tiɣri uselway n Ugraw Aɣerfan Aɣelnaw, Brahim Boughali, ass n ukwas, i usmuteg n usaḍuf agmanan ara d-yilin deg udeg n usaḍuf 12-06 n 12 Yennayer 2012 yerzan tiddukliwin yernu aḍris-a amaynu d win ara « yeddun d wayen tesri Zzayer tamaynut d yilugan n tmenḍawt n 2020 am wakken ara yeddu waya d tmuɣli n uselway n tegduda, Mass Abdelmadjid Tebboune, ay yefkan tixxutert meqqren i temlilt n tmetti taɣarimt s umata d tiddukliwin s lxuṣuṣ ».

Deg yiwet n tinawt ay d-yeɣra i lmend n urẓam n wass awamni n tiddukliwin ay tessuddes tesmilt n tillumẓa d waddal n Ugraw Aɣerfan Aɣelnaw, yenna-d Mass Boughali dakken tamenḍawt tettafk tixxutert i useɣnew n tiddukliwin yernu aya yesskanay-d tamlilt-nsent deg tmeṣkiwt n tmetti d ufara anɣermay, am wakken ay d-yerna dakken tiskarin n useɣnew n tiddukliwin yessefk ad d-ttwasbadunt s usaḍuf agmanan.

« Aseɣnew n tiddukliwin d azref amenḍawan yernu d ammak ayyes ara mezɣen medden izerfan n umdan », ɣef wakken ay d-yenna, am wakken ay d-yerna dakken asaḍuf agmanan d win ay d-yelhan s tiddukliwin ay yesdusuyen tigejda n tenbaḍt deg usefrek, yernu tiddukliwin ttakfent-d tannayt-nsent deg wayen yerzan aseqdec amaɣẓan n yidrimen inagduden am wakken ay sseḥbibirent ɣef useḍru n yisenfaren n usnegmu s uzrak n tegna ay d-yettwasebḍen.

Tiddukliwin yessefk ad d-lhunt s wakk ayen yerzan timetti, tigemmi-nnes, tanḍa-nnes tadelsant, tuggta n yinsayen-nnes d tlemsiwin-nnes, ɣef wakken ay d-iwekked, am wakken ay d-yerna dakken « tabaɣurt d tenḍa n Zzayer sdusuyent amyamaẓ aɣelnaw acku isegren n tmetti bedden akk ɣef yiwen n uqaleb aɣelnaw ».

Aselway n Ugraw Aɣerfan Aɣelnaw iger-d tiɣri i tiddukliwin akken « ad snernint tafrit yernu ad semlent taẓraɣlant deg tmetti ladɣa gar yilemẓiyen akken ad ten-sbeɣsen ad nnaɣen mgal yixeṣṣaren d tguriwin tinmettiyin tibawin yernu ad derwen deg userbeḥ n yisenfaren n usnegmu ay d-yettwaheyyan ».

 

Last modified on Asamas, 24 Yebrir 2022 10:37
Tiddukliwin: Iger-d tiɣri Boughali i usaḍuf ara yeddun d tmenḍawt d tmuɣli n uselway Tebboune
  Yeffeɣ-d ass n : Asimwas, 22 Yebrir 2022 15:04     Taggayt : LEZZAYER     Ɣran-t : 2 n tikkal   Bḍu