Menu principal

Menu principal

Agraw Aɣerfan Aɣelnaw: Asdabu n Tegrawt n Tammidwa gar Zzayer d Ccinwa

Yeffeɣ-d ass n : Akras, 23 Fuṛaṛ 2022 13:11   Ɣran-t : 2 n tikkal
Agraw Aɣerfan Aɣelnaw: Asdabu n Tegrawt n Tammidwa gar Zzayer d Ccinwa

ZZAYER TAMANEƔT – Sduban, ass n usinas, deg tesɣimt n Ugraw Aɣerfan Aɣelnaw, Tagrawt Tawamnit n Tammidwa gar Zzayer d Ccinwa s yiswi n usdusu n unmireg gar snat-a n tmura.

Tafugla n usdabu n Tegrawt Tawamnit n Tammidwa gar Zzayer d Ccinwa isagg fell-as uselway n tesmilt n yiweẓla iwerdaniyen, anmireg d umɣiwan aɣelnaw deg uzɣar, Mohamed Hani, s tihawt n uselway n Tegrawt Tawamnit n Tammidwa gar Zzayer d Ccinwa, Said Hassi d unemhal n Asya Talemmast d Tegmuḍant n uɣlif n yiweẓla iwerdaniyen d umɣiwan aɣelnaw deg uzɣar, Mohamed Yazid Bouzid ɣer yidis n unmazal n Ccinwa deg Zzayer, Li Lianhe.

Yenna-d Mass Hani dakken tagrawt n tammidwa gar Zzayer d Ccinwa d « tin ara yesdusen assaɣen n unmireg d temsetlelt gar snat-a n tmura », yernu yerna-d dakken asdabu-nnes yella-d mi d-yella usarag n teẓrit gar uselway n Ugraw Aɣerfan Aɣelnaw, Brahim Boughali, d uselway n Tseqqimt Timezgit n Ugraw Aɣerfan Aɣelnaw n Tegduda Taɣerfant n Ccinwa, yernu d aya ay d-yesskanayen tixxutert ay tettakf Zzayer i wassaɣen-nnes d Ccinwa.

I lmend n waya, iwekked-d dakken « Zzayer tedhel Ccinwa war akukru seg yidis asertan akken ad d-terr adeg-nnes uzrif deg Tuddsa n Yiɣlanen Yeddukklen deg 1971 yernu yella-d waya deg ukatar n wassaɣen iqburen icerken snat-a n tmura ».

Seg yidis niḍen, yebder-d umasay-a aɣawas asemseggas wis sin n unmireg asnuddsan amakki gar snat-a n tmura (2022-2026) ara d-yesɣenwen tadinamit ay yuklal uswir n wassaɣen gar Zzayer d Ccinwa, am wakken ay d-yerna dakken tigawt tawamnit ad tili d afecku n usemyades d usdusu n teɣwalt d tmura timidiyin d teysetmatin.

 

Last modified on Akras, 23 Fuṛaṛ 2022 15:37
Agraw Aɣerfan Aɣelnaw: Asdabu n Tegrawt n Tammidwa gar Zzayer d Ccinwa
  Yeffeɣ-d ass n : Akras, 23 Fuṛaṛ 2022 13:11     Taggayt : LEZZAYER     Ɣran-t : 2 n tikkal   Bḍu