Deg yiwet n tdiwennit tansawalt d tesgilt n « Yinebli n Tnezzayt » deg ṛṛadyu n Illizi, deg ukatar n usfugel n umulli wis 25 n uciri n terga-a n ṛṛadyu, iwekked-d Mass Baghali dakken « ṛṛadyu tazzayrit yeddem tamasit d taxatart deg umennuɣ mgal telɣa tikerkasin d yiɣawasen yesɛan nneyya n diri yernu kkaten akken ad cewwlen Zzayer » yernu yella-d waya s usɛeddi n wahilen « izerrken ilugan n usadur d tesnaɣant yernu ḥerrzen azref n uɣerman akken ad t-id-awḍen yisalan d imesɣura s nneyya yeṣfan ».

« Ṛṛadyu taɣelnawt tettmahal deg ukatar n tesnuddest n uwanak n usiweḍ n taɣect n tdeblin tidiganin d tlemmasin i uɣerman ula ma meqqren tmurt, yernu iswi n waya d abdad i yiɣeblan n uɣerman », ɣef wakken ay d-yenna unemhal amatu n ṛṛadyu taɣelnawt.

I lmend n waya, yeckeṛ-d Mass Baghali tuɣdaḍt ay tetteg ṛṛadyu n Illizi deg uḥraz n tutlayt d yidles amaziɣ yellan d aḥric seg tmagit taɣelnawt yernu targa-a n ṛṛadyu d yiwet seg 25 n tregwa n ṛṛadyu ay tesɛa tmurt yernu sɛeddayent-d ahilen s 8 n tsenfal n tutlayt tamaziɣt.

I lmend n waya, yerra tajmilt i wussisen ay ttgen yimahalen n ṛṛadyu akken ad ḍemnen ameẓlu yelhan 24 n yisragen deg wass deg twilayin n Illizi d Ǧanet.

Ṛṛadyu Tazzayrit n Illizi tebda deg 27 Yennayer 1997 s ubleɣ asragan n umsaka n kraḍ n yisragen deg wass. Yebda yettnerni ubleɣ-a armi ay yewweḍ ɣer 24 n yisragen s tutlayin taɛṛabt d tmaziɣt (tasenfelt tamaceɣt).