« Deg tallit n kra kan n wussan, nekles-d timerniwt n umḍan n yimdanen ay yuḍnen aḍḍan-a. S waya, deffir ma nella nettmagar 25 n yimuḍinen deg wass, neqqel nettmagar 300 yernu azgen seg wid d-yettasen ɣer-neɣ d imahalen n tdawsa », ɣef wakken ay d-yenna umasay-a ay d-yellan d inebgi deg ṛṛadyu taɣelnawt.

Yenna-d, deg temsalt-a, dakken aktamur n waḍḍan yella-d d « aklisan » gar yimahalen n tdawsa yernu aya yegla-d s « wuguren d imeqqranen » deg wayen yerzan asefrek n yirmuden n uzadur, ladɣa deg wayen yerzan asemḍef n yimuḍinen.

Apṛufisur Belhadj yesḥassef imi ula ma tella-d teɣri i tgezzayt, maci aṭas n medden ay d-yusan ad tt-gen ula gar yimahalen n tdawsa.

Yesmekti-d dakken Zzayer tekles-d, seg tezwara n tkaɣreft, « 448 n tmettanin gar yimahalen n tdawsa, gar-asen sin n yimuren ɣef kraḍ d imsujjiyen. » S wawal niḍen, 250 n yimsujjiyen ay yemmuten seg waḍḍan n Covid-19.

Yebder-d daɣ yiwet n tezrawt tasnaddadant n uɣlif n tdawsa ay d-ikecfen dakken « 90% seg yimdanen ay yettawḍen ɣer usduy d imdanen ur igin tagezzayt ».

« Amɣar niɣ amdan ilan aḍḍan imezgi yernu ur itteg ara tagezzayt amzun yenɣa iman-nnes », ɣef wakken ay d-yenna, am wakken ay d-iger daɣ tiɣri akken ad wten medden ula d tagezzayt n « tezgut tasemhuyant ».