« Asaḍuf n tedrimt n 2022 ad yeǧǧ tibankiwin niɣ iɣsuren idrimanen ad adfen ɣer taggazt war ma yessareg-itent unebbaḍ n Tbanka n Zzayer. Aya d asduqqes sɣur yiduba inagduden akken ad sbeɣsen tiṛmisin, maci ala tiṛmisin tidrimanin kan, wanag ula d tiyaḍ, akken ad adfent ɣer taggazt. Aya daɣ d asɣel ijehden i teṛmisin, ama d tinagdudin, ama d tusligin », ɣef wakken ay d-yenna Mass Benmouhoub i Terga Tis Kraḍt n Ṛṛadyu Tazzayrit.

Yesmekti-d Mass Benmouhoub dakken aneɣlaf amenzu, aneɣlaf n tedrimt, Mass Aimene Benabderrahmane ixebber-d dakken ad ssidfen snat n tbankiwin tinagdudin ɣer taggazt deg 2022, am wakken ay llant teṛmisin timecṭuḥin d tlemmasin n ugzum uslig ay yessersen asuter akken ad adfent ɣer Taggazt n Zzayer, yernu yenna-d dakken « ma drus, llant kuẓet niɣ semmuset n teṛmisin ara yadfen ɣer taggazt deg 2022 ».

Yerna-d dakken « kra n teṛmisin tusligin ay d-yettewgen deg ukatar n Tnegga Taɣelnawt n Udhal n Usemres n Yilemẓiyen ssewjadent iman-nsent akkena d adfent ɣer taggazt ».

Seg yidis niḍen, iwekked-d Mass Benmouhoub dakken « asidrem s taggazt yerza akk tiṛmisin akken yebɣu yili ugzum-nsent » yernu « taggazt tezmer ad tili d allal ijehden deg usidrem n teṛmisin s lqis alemmas d wubɛid ».

Deg wayen yerzan asidef n tgemma ɣer taggazt, yenna-d Mass Benmouhoub dakken llan 65 n yisenfaren ay yettwassidermen s yidrimen n usenduq uzzig n Algeria Startup Fund seg wasmi ay d-yettwasseɣnew deg 2020, yernu yenna-d dakken ulzuz aggazan ara d-yelhun s waya itteddu ad d-ilal yernu ad yebdu amahil seg-a ɣef kraḍ niɣ kuẓ n yiseggasen.