Menu principal

Menu principal

Amtawa n tɣellist gar Meṛṛuk d Uyun Aṣehyuni d « abekkaḍ ameqqran »

Yeffeɣ-d ass n : Aynas, 29 Wamber 2021 10:24   Ɣran-t : 0 n tikkal
Amtawa n tɣellist gar Meṛṛuk d Uyun Aṣehyuni d « abekkaḍ ameqqran »

ƔEZZA – Yenna-d umussu n uzbu afalesṭini Ḥamas dakken azmal ay tezmel Meṛṛuk mennaw n yimtawayen ladɣa deg unrar aɣellisan d Uyun Aṣehyuni d « abekkaḍ ameqqran » yernu iger-d tiɣri i unhil ameṛṛuki akken « ad isemmet » war leɛḍil imtawayen-a yernu « ad yegzem assaɣen-nnes d Isṛayil ».

« Azmal ay yezmel unhil ameṛṛuki mennaw n yimtawayen, ladɣa deg unrar aɣellisan d uredsan,  akked ucengu aṣehyuni d igi n lbaṭel ur yesɛin kra n ssebba niɣ iswi yesseqnaɛen », ɣef wakken ay d-iwekked Ḥamas deg yiwen n ulɣu ay d-yeffɣen ass n usiḍyas tameddit.

Yerna-d daɣ dakken « tinufa tisnuddsanin n uɣlan aɛṛab aydeg tedrew Meṛṛuk ur yessefk ad ttwarekḍen ɣer yidis n ucenga n uɣlan d uɣref afalesṭini », yernu yessemɛen-d s waya ɣef unewdag isṛayili yettkemmilen itteg tijrimin yernu yettkemmil arkaḍ n yizerfan n umdan deg temnaḍt.

« Adeg amezruyan n Meṛṛuk d temlilt n uɣref-nnes deg wayen yerzan Falesṭin d Lquds yella-d mgal usegnu n wassaɣen d ucengu aṣehyuni », ɣef wakken ay d-yenna umussu-a afalesṭini n uzbu.

Tirzi ay iga ussan-a yezrin Benny Gantz, aneɣlaf aṣehyuni n umzaɣ, ɣef Meṛṛuk d « abekkaḍ ameqqran mgal uɣref afalesṭini d temsalt-nnes tuɣdimt », ladɣa imi Gantz « iga tijrimin mgal Yifalesṭiniyen, ladɣa tisednan d yigerdan, yernu yesberrew ixxamen am wakken ay d-iḥettem taqbart d tumqitt ɣef Ɣezza yernu yewwi akal afalesṭini aydeg ay yebna tihras ». Aya akk yella-d « d anemgal ummid d tmeɣsiwt n uɣlan d waddud adettan n uɣref ameṛṛuki yugin akk assaɣen d yimtawayen d Uyun Aṣehyuni », ɣef wakken ay d-twekked Ḥamas.

 

Amtawa n tɣellist gar Meṛṛuk d Uyun Aṣehyuni d « abekkaḍ ameqqran »
  Yeffeɣ-d ass n : Aynas, 29 Wamber 2021 10:24     Taggayt : LEZZAYER     Ɣran-t : 0 n tikkal   Bḍu