Menu principal

Menu principal

Yenṭel umǧahed Lakhdar Bouragaa deg tenṭelt n Sidi Yahia Lezzayer

Yeffeɣ-d ass n : Asimwas, 06 Wamber 2020 16:05   Ɣran-t : 3 n tikkal
Yenṭel umǧahed Lakhdar Bouragaa deg tenṭelt n Sidi Yahia Lezzayer

LEZZAYER  TAMANEƔT - Amǧahed anesɣamu n usqamu n ugezdu wis IV amezruyan, Lakhdar Bouragaa, yemmut ass n ukras (larebɛa) tameddit deg Lezzayer tamaneɣt netta deg leɛmer-is 87 n yiseggasen, yenṭel ass n ukwas (lexmis) deg tenṭelt n Sidi Yahia, deg ugezdu n Lezzayer, s tihawt n waṭas n yimdanen usan-d ad rafqen amerḥum ɣer uxxam-is aneggaru.

Ilul deg useggas n 1933 deg Lumarya yellan deg ugezdu n Mdiya, yerwel-d Lakhdar Bouragaa seg tredsa tafransit anda yella yesɛedday ameẓlu-s aredsan akked ad yekcem ɣer Tredsa n Uslelli Aɣelnaw ‘agezdu wis 4). Yella d aɣella n usun wis 2 seg 1959 ar 1960, sakin d anesɣamu n usqamu aneggaru n ugezdu wis 4 armi t-id-yufa uzarug s usellun n umenzaḍ.

Aselway n leɛḍil n Usqamu n uɣlan, Salah Goudjil, yenna-d ass n ukwas (lexmis) dakken tesṛuḥ Lezzayer yiwen n "umǧahed amekdi" akked daɣen "d azamul n umennuɣ n uslelli aɣelnaw".

"D ameɣnas n Ukabar n uɣref azzayri (PPA) yerna d amenzaḍ n ugezdu wis IV tamezruyant, yella Lakhdar Bouregaa d yiwen n umǧahed amekdi akked daɣen d azamul n umennuɣ n uslelli aɣelnaw", i yerna yenna-d.

Seg yidis-is, aneɣlaf Amezwaru, Abdelaziz Djerad yenna-d dakken tesṛuḥ Lezzayer "yiwen n umeɣnas, amḥaddi n wayen i yes-s yumen deg wayen yerzan abeddel, yeqqim d amekdi i tmuɣli-s ayen akk yedder".

"S tmettant n umǧahed akked umenzaḍ aqbur n ugezdu wis IV amezruyan, amenzaḍ Si Lakhdar Bouragaa, iṛuḥ-as i Lezzayer yiwen n umeɣnas, yiwen n umḥaddi n tmuɣliwin-is yerzan abeddel, i umi yeqqim d amekdi ayen tekka akk tmeddurt-is", i yura uneɣlaf Amezwaru ɣef usebter-is n Facebook.

Seg yidis-is, Ajiniral n Tfekka n Tredsa, Saïd Chanegriha, Aɣella n Yifesyanen n Tredsa taɣelnawt taɣerfant yessimel, s yisem-is akked yisem n wakk imehhalen n Tredsa taɣelnawt taɣerfant, aɛezzi-s i twacult-is akked yiqriben n umǧahed Amenzaḍ, Lakhdar Bouregaa.

Seg yidis-is, aneɣlaf n yimǧuhad akked wid ilan azref, Tayeb Zitouni yenna-d, deg yiwen n yizen  i yuzen i twacult n umǧahed, dakken Lezzayer iṛuḥ-as yiwen n "urgaz yefkan tameddurt-is i tmurt-is".

Aneɣlaf n Teɣwalt, amutlay n Unabaḍ, Ammar Belhimer, yuzen ula d netta, yiwen n yizen n uɛezzi i twacult n umǧahed, ideg izul tabɣest akked tiffernent n umerḥum, yerna yemmeslay-d ɣef ubrid i d-yewwi d ameɣnas, d amḥaddi n yizerfan akked tlelli.

Last modified on Asimwas, 06 Wamber 2020 16:08
Yenṭel umǧahed Lakhdar Bouragaa deg tenṭelt n Sidi Yahia Lezzayer
  Yeffeɣ-d ass n : Asimwas, 06 Wamber 2020 16:05     Taggayt : LEZZAYER     Ɣran-t : 3 n tikkal   Bḍu