Ɣetsen daɣ ad skeyden, d yicriken inmettiyen, « tasemselt iwatan i tukksa tafarant n usekmen deg wayen yerzan kra n yisaduren d yirmuden inezzanen aydeg ulac tamijewt d tameqrant deg uzraɛ n unfafad bu uqacuc, ɣer yidis n yirmuden ay yesɛan asemdu d usrid deg tmeddurt n uɣerman deffir ma bedden acḥal », am wakken ay d-yella wawal ɣef ulfus n tallalt n yimsenza imecṭuḥen ay iḥuza usekmen d uɛeffu-nsen seg kra n tewsiwin.

I lmend n waya, yenna-d uselway n tegduda dakken yessedwet-it unelhu afaran ay d-yellan deg umennuɣ mgal uzraɛ n unfafad bu uqacuc, am wakken ay d-iḥettet dakken yessefk ad ikemmel uqader n wakaten n uḥezzeb, ladɣa timelsiwt n tgelmust n umesten d uqader n umgugu afekkan gar yimdanen.

Yeckeṛ-d uselway n tegduda tiɣersawin ay gan yimahalen n tdawsa akken ma llan, am wakken ay d-yessenfali leqder-nnes udmawan i yimdanen-a d usnemmer n uɣlan i tɣersawin-nsen, yernu iwekked-d dakken imdanen-a ttgensisen-d azamul n tɣersawt yernu Lezzayer tettzuxxu yes-sen am wakken werǧin ad ten-tettu.

Aselway n tegduda iger-d daɣ tiɣri i yiɣermanen akken ad kemmlen ad ttqadaren akaten n uḥezzeb akken ad kemmlen yigmaḍ umnigen ay d-yellan deg umennuɣ mgal unfafad bu uqacuc, am wakken ay d-iger daɣ tiɣri i yiwaliyen anda ay yettwakkes usekmen s wudem ummid akken ad qqimen ad ttḍafaren tagnit s uqader n wakaten-a, ladɣa deg wayen yerzan agdal n yimsegrawen d tmeɣriwin.